Laçındakı yeganə kitab evi niyə hədəfə alınıb?- abadlıq adı altında bərbadlıq

   Manevr.az bildirir ki, Laçında yeganə mədəniyyət və mənəviyyat ocağı sayılan "Simurq" Kitab Evinin bağlanması təhlükəsi ilə bağlı Laçın rayon sakini Ayaz Qasımov həyəcan təbili çalır. Mədəni obyektlər təkcə kitab təqdim edən məkan deyil, həm də insanların asudə vaxtını səmərəli keçirdiyi, mənəvi dünyasını zənginləşdirdiyi və şəhərin ruhunu yaşadan mühüm mərkəzlərdir. Belə bir məkana qıfıl vurmaq şəhərin sosial-mədəni mühitinə və sakinlərin asudə vaxtına vurulan ciddi zərbədir.

""Simurq" Kitab Evinin bağlanması ilə bağlı səslənən fikirlər haqlı olaraq böyük narahatlıq doğurur. Görünən odur ki, "Bakı Abadlıq" MMC gözünü kitab evinə dikib və onun fəaliyyətinin dayandırılmasını istəyir. Halbuki həmin kitab evinin nə "Bakı Abadlıq" MMC-yə bir aidiyyəti, nə də onun fəaliyyətinə hər hansı maneçiliyi var.

Amma təəssüf ki, bəziləri hələ də "Bağdadda kor xəlifədir, burada mənəm" prinsipi ilə hərəkət etməyə adət ediblər.

Bir şəhərin kitab evini bağlamaq sadəcə bir obyektin qapısına qıfıl vurmaq deyil. Bu, kitaba, mədəniyyətə və şəhərin mənəvi həyatına olan münasibətin göstəricisidir. Abad edilmiş mədəniyyət ocağını bərbad etməkdə israrlı görünən bu yanlış qərarın qarşısı vaxtında alınmalıdır. Laçın "Simurq" Kitab Evi bağlanmamalı, əksinə, fəaliyyətini davam etdirərək şəhərin mədəni həyatına xidmət etməlidir"- Ayaz Qasımov qeyd edib.