Əkrəm Əylisli beynəlxalq mükafata layiq görüldü

Nasir, dramaturq və tərcüməçi Əkrəm Əylisli Sovet dövründə qələmə aldığı “Adamlar və ağaclar” trilogiyasının ingilis dilinə tərcüməsinə görə Avropa Yenidənqurma və İnkişaf Bankının (EBRD) 2026-cı il Ədəbiyyat Mükafatına layiq görülüb.

Manevr.az xəbər verir ki, mükafatın qısa siyahısında yer alan əsər final mərhələsində polyak yazıçısı Yatsek Dukayın “Buz” romanı və misirli müəllif Şadi Lyuisin “Qrinviç xəttində” kitabı ilə yarışıb. Münsiflər heyətinin sədri Maya Yaqqi tərcüməçi Ketrin E. Yanqın rusdilli mətndən etdiyi tərcümədə əsərin atmosferini uğurla qoruduğunu qeyd edib. Avtobioqrafik elementlərlə zəngin olan trilogiyada İkinci Dünya müharibəsi illərində Azərbaycanın dağ kəndindəki çətin həyat şəraiti bir uşağın gözü ilə təsvir olunur.

Xatırladaq ki, Əkrəm Əylisli 2012-ci ildə nəşr olunan və erməni-azərbaycanlı münasibətlərindən bəhs edən “Daş yuxular” povestindən sonra ictimaiyyətin və rəsmi qurumların sərt reaksiyası ilə üzləşib. Yazıçı Xalq yazıçısı fəxri adından və Prezidentin fərdi təqaüdündən məhrum edilib, barəsində cinayət işi açılıb və 2016-cı ildən ölkədən çıxışına məhdudiyyət qoyulub.