Azərbaycanda buğdanın idxalı və satışı 3 il müddətinə ƏDV-dən azad ediləcək

Azərbaycanda buğdanın idxalı və satışı 3 il müddətinə ƏDV-dən azad ediləcək. Milli Məclisin İqtisadi siyasət, sənaye və sahibkarlıq, eləcə də Hüquq siyasəti və dövlət quruculuğu komitələrinin birgə iclasında vergilər naziri Fazil Məmmədov deyib ki, bununla bağlı Vergi Məcəlləsinə dəyişikliyin edilməsi təklif olunur.

Onun sözlərinə görə, qanun layihəsində buğdanın idxalı və satışı ilə yanaşı, buğda unu və çörəyin istehsalı və satışının da 3 il müddətinə ƏDV-dən azad edilməsi nəzərdə tutulur.
Xatırladaq ki, manatın ikinci devalvasiyasından sonra bölgələrdə çörəyin və unun qiymətinin qalxması ilə əlaqədar əhali etiraz aksiyası keçirmişdi. Bundan sonra hökumət məsələyə müdaxilə edib, sahibkarlara qiymətləri yenidən aşağı endirməyi tapşırmışdı. Nəticədə isə devalvasiyadan sonra bahalaşan unun qiyməti yenidən endirilmişdi.

Nə üçün məhz çörək və un?

İqtisadçı ekspertlər bildirirlər ki, Azərbaycan əsas yeyinti məhsullarını əsasən xaricdən idxal edir. Bunun nəticəsidir ki, manatın dollara nisbətdə dəyər itirməsi ilə marketlərdə də ərzaqların qiyməti bahalaşır. Bəs hökumət nə üçün digər ərzaq məhsullarının da idxalını sadələşdirmir?

Ekspert Rəşad Həsənov “Yeni Müsavat”a bildirib ki, ilk olaraq ona diqqət etmək lazımdır ki, çörəyin üzərindən ƏDV əslində götürülməyib: “Sadəcə olaraq, mövcud güzəştlərin vaxtı uzadıldı. Bir çox hallarda vətəndaşlar ƏDV-nin götürülməsini və qiymətlərin niyə ucuzlaşmadığını soruşurlar. Yenilik burada ondan ibarətdir ki, sadəcə yanvar ayının 1-də mövcud güzəşt qərarının vaxtı bitirdi. Əgər bu, uzadılmasaydı, o zaman ölkədə un məhsullarının qiymətində ciddi bahalaşma müşahidə olunacaqdı. İlk növbədə bunun qarşısı alındı. Siyahıya quş ətinin satışı da əlavə edildi. Bir məsələyə toxunmaq lazımdır ki, Azərbaycanda hazırda sosial problemlər içərisində ən mühüm prioritet təşkil edən məsələ ərzaq məhsullarının qiymətlərinin müəyyən qədər tənzimlənməsidir.

Burada söhbət administrativ təzyiqlər yolundan deyil, vergi güzəştlərinin tətbiqi, yerli istehsalın təşviqi, rəqabət mühitinin dərinləşdirilməsi kimi üsullardan gedir. Yeni vergi qanunvericiliyinə uyğun olaraq, Azərbaycan artıq növbəti dövrlərdən diferensial vergi siyasətini həyata keçirməyə başlayacaq. Bu, imkan verəcək ki, fərqli əhəmiyyətliliyindən asılı olaraq, məhsulların istehsalına, idxalına vergi dərəcələri tətbiq olunsun. Bu zaman böyük ehtimalla hökumət daxili bazarlarda müəyyən xidmət dəyişikliyinin tənzimlənməsi məqsədilə digər məhsullara da qeyd olunan istiqamətlər üzrə güzəştlər tətbiq edə bilər. Bu, ƏDV-nin və digər vergi növlərinin ləğvi də ola bilər”.

İqtisadçı ekspert Qadir İbrahimli isə bildirib ki, bu qərarın məhz çörəklə bağlı olması təsadüfi deyil:

“Sadəcə olaraq, çörək daha çox istehlak olunur. Digər ölkələrlə müqayisədə bizim cəmiyyətdə həm də çörəyə olan münasibət də başqadır. Bu baxımdan, çörəyin qiyməti sosial mühitə də təsir göstərir. Bütün bunlara görə də hökumət çörəyin qiymətini diqqətdə saxlayır. Burada başqa amil yoxdur”.