Mədəniyyət Nazirliyinin təşkilatçılığı ilə 23-26 aprel tarixlərində Azərbaycanda ilk dəfə keçirilən Qırğız Mədəniyyəti Günləri sona çatıb.
Nazirlikdən verilən xəbərə görə, aprelin 26-da Azərbaycan Dövlət Akademik Musiqili Teatrında Qırğız Mədəniyyəti Günlərinin təntənəli bağlanış mərasimi keçirilib.
Tədbirdə mədəniyyət naziri Adil Kərimli, Qırğızıstanın mədəniyyət, informasiya, idman və gənclər siyasəti naziri Altınbek Maksutov, iki ölkənin mədəniyyət və incəsənət xadimləri, ictimaiyyət nümayəndələri və digər qonaqlar iştirak ediblər.
Əvvəlcə qonaqlar Akademik Musiqili Teatrın foyesində təqdim edilən Qırğızıstanın dekorativ-tətbiqi və təsviri sənət ustalarının əsərlərindən ibarət sərgi, geyim kolleksiyası və milli mətbəx nümunələri ilə tanış olublar.
Qırğızıstanın mədəniyyət, informasiya, idman və gənclər siyasəti naziri Altınbek Maksutov çıxış edərək deyib ki, Azərbaycan və qırğız xalqlarının dostluq və qardaşlığının əsasında həm də mədəni münasibətlər, ümumi dəyərlər dayanır. Altınbek Maksutov qırğız nümayəndə heyətinə göstərilən qonaqpərvərliyə və mədəniyyət günlərinin səviyyədə təşkilinə görə Mədəniyyət Nazirliyinə təşəkkür edib. O həmçinin ölkəmizin incəsənət ustalarını Qırğızıstanda keçiriləcək Azərbaycan Mədəniyyəti Günlərində görmək istədiyini də dilə gətirib.
Altınbek Maksutov Azərbaycan Dövlət Tərcümə Mərkəzi Dünya ədəbiyyatı şöbəsinin müdiri, yazıçı, kinossenarist, tərcüməçi Nəriman Əbdülrəhmanlıya Qırğızıstanın “Mədəniyyət əlaçısı” döş nişanını təqdim edib. Yazıçı Qırğız Respublikasının mədəniyyət və incəsənətinin inkişafına verdiyi töhfəyə görə bu təltifə layiq görülüb.
Daha sonra qardaş ölkənin incəsənət ustalarının ifasında qala-konsert təqdim olunub.
Konsertdə Qırğızıstanın Xalq artisti Azamat Bolqonbayev, Əməkdar artistlər “Manas”çı Samat Koçorbayev, Elnurə Muktarbekqızı, Gülzinət Surançiyeva, həmçinin Abdılas Maldıbayev adına Qırğızıstan Milli Akademik Opera və Balet Teatrının artistləri Atabek Sadırkulov və Dayana Kıdırəliyeva, “Muras” Folklor-Etnoqrafik Ansamblı, Nurdin Tuqolov adına “Ak-Maral” Dövlət Rəqs Ansamblı, Toktoqul Satılqanov adına Qırğızıstan Milli Filarmoniyasının adına Estrada-Simfonik Orkestri və başqa ifaçılar çıxış ediblər.
Proqramda “Vətən” (söz – Şailoobek Duyşeyev, musiqi – Muratbek Beqaliyev), “Səhər sirri” (Əsgər İsayev, Sərdarbek Juməliyev), “Səhər bülbülü” (Turar Kojomberdiyev, Nəsır Davlesova), “Sevgilim” (söz və musiqi – Jamin Akimaliyeva), “Aseldeyim” (söz və musiqi – Bek Borbiev) və digər mahnılar ifa olunub.
Qırğızıstan ifaçılarının təqdim etdiyi musiqi və rəqs nömrələri alqışlarla qarşılanıb.
Qonaq ifaçıların Azərbaycan musiqisinə müraciəti isə xüsusi rəğbət doğurub. “Səndən nigaranam” və “Azərbaycan” mahnıları gurultulu alqışlarla mükafatlandırılıb. Bununla da, Bakıda qırğız mədəniyyəti və incəsənəti şöləni tarixə qovuşub.
Xatırladaq ki, mədəniyyət günləri çərçivəsində Qırğızıstan incəsənət ustalarının qala-konserti ilə yanaşı, Qırğız Kinosu Günləri və “Azərbaycan-Qırğızıstan mədəni-humanitar dostluq əlaqələri” mövzusunda iki ölkə ziyalılarının görüşü keçirilib. Bundan əlavə, Qırğızıstan Milli Tarix Muzeyinin “Qədim incəsənətin şah əsərləri” adlı sərgisi, tanınmış rəssam, modelyer-dizayner Dilbər Aşımbayevanın etno-model kolleksiyası və milli mətbəx nümunələri təqdim edilib.