Çində plastik tullantıların təkrar istifadəsi ilə bağlı maraqlı layihə həyata keçirilib. Şanxayda 6 mindən çox istifadə olunmuş süd qabı və digər plastik tullantılar asfalt örtüyünün hazırlanmasında istifadə edilib.
Manevr.az xəbər verir ki, layihə 2021-ci ildə Şərqi Çin Elm və Texnologiya Universitetinin ərazisində reallaşdırılıb.
Layihə “Dow” şirkəti və “Shiny Meadow” süd məhsulları brendi tərəfindən hazırlanıb. Məqsəd təkrar emalı çətin olan plastik tullantılara yeni istifadə sahəsi yaratmaq olub.
İstifadə olunmuş süd qabları və digər plastik materiallar emal edilərək polimerlə modifikasiya olunmuş asfaltın tərkibinə əlavə edilib. Beləliklə, adi halda tullantıya çevrilə biləcək material yol örtüyünün bir hissəsinə çevrilib.
Mütəxəssislərin sözlərinə görə, bu yanaşma plastik tullantıların poliqonlara göndərilməsinin qarşısını almaqla yanaşı, onların infrastruktur layihələrində istifadəsinə da imkan yaradır.
Süd qablarının təkrar emalı niyə çətin idi?
Məlumata görə, süd qabları texniki baxımdan təkrar emal oluna bilsə də, onların üzərində qalan süd qalıqları yüksək çirklənməyə səbəb olur. Buna görə də bir çox təkrar emal müəssisəsi belə qabları qəbul etməkdən imtina edir.
Nəticədə təkrar istifadəsi mümkün olan plastik material da adi tullantı kimi atılır.
“Shiny Meadow” şirkətinin nümayəndəsi Lin Jun bildirib ki, şirkət qablaşdırmada təkrar emal edilə bilən materiallardan istifadə etsə də, süd qablarının sonrakı taleyi problem olaraq qalırdı.
Onun sözlərinə görə, plastik qabların yol tikintisində istifadəsi bu materiallara yeni həyat verir və onları tullantı olmaqdan çıxarır.
Plastik tullantılar asfalt materialına çevrildi
“Dow” şirkəti təkrar emalı çətin olan plastikləri toplayaraq onları yol tikintisində istifadə edilən polimerlə modifikasiya olunmuş asfaltın tərkibinə əlavə edib.
Layihə çərçivəsində 6 mindən çox istifadə olunmuş süd qabı və digər plastik tullantılar Şanxaydakı universitet kampusunun yol örtüyünün hazırlanmasında istifadə olunub.
Şirkət nümayəndələri bildiriblər ki, materialşünaslıq sahəsindəki texnologiyalar əvvəllər təkrar emal üçün yararsız hesab edilən plastiklərə yeni istifadə sahələri yarada bilər.
“Dow” şirkətinin Asiya-Sakit okean regionu üzrə nümayəndəsi Bambanq Çandra bildirib ki, layihənin əsas məqsədi istifadə olunmuş plastik qablaşdırmalara yeni təyinat verməkdir.
Şirkət ümid edir ki, bu təcrübə digər istehsalçıları da plastik tullantıların azaldılması üçün alternativ həllər axtarmağa təşviq edəcək.
Plastik yol emissiyaları da azalda bilər
Layihənin yalnız plastik tullantıların utilizasiyası baxımından deyil, ekoloji cəhətdən də üstünlükləri olduğu bildirilir.
“Dow”un məlumatına görə, asfaltın hazırlanmasında təkrar emal edilmiş plastikdən istifadə bituma olan tələbatı azalda bilər. Bundan əlavə, belə yol örtüklərinin istismar müddətinin daha uzun olması ehtimal olunur.
Bu isə enerji sərfiyyatının və istixana qazı emissiyalarının azalmasına kömək edə bilər.
Şirkət layihəni tullantı probleminin infrastruktur həllinə çevrilməsinin nümunəsi kimi təqdim edir.
Asiyanın başqa ölkələrində də sınaqdan keçirilib
Şanxaydakı layihə “Dow” şirkətinin Asiyada plastik tullantılardan yol tikintisində istifadə etdiyi ilk təşəbbüs deyil.
Şirkət 2017-ci ildə İndoneziyanın Depok şəhərində təkrar emal olunmuş plastikdən istifadə etməklə yolların yenilənməsinə başlayıb.
Daha sonra Hindistanın Pune və Banqalor şəhərlərində oxşar layihələr həyata keçirilib. Taylandda isə “Siam Cement Group” şirkəti ilə əməkdaşlıq qurulub.
Şərqi Çin Elm və Texnologiya Universitetinin nümayəndələri hesab edirlər ki, Şanxaydakı plastik yol ekoloji problemlərin həllində qeyri-standart yanaşmaların praktik nümunəsidir.
Universitetin vitse-prezidenti professor Li Tao bildirib ki, bu layihənin tələbələri davamlı inkişaf sahəsində yaradıcı və qeyri-adi həllər axtarmağa təşviq edəcəyinə ümid edirlər.lent.az