Yağışlı hava Sumqayıtda nəqliyyatın hərəkətini çətinləşdirib - FOTOLAR

Hazırda Sumqayıt şəhərində müşahidə edilən intensiv yağışlı hava şəraiti küçə və prospektlərdə nəqliyyatın hərəkətində bir sıra çətinliklər var və tıxac yaranıb. 

Əlverişsiz hava şəraiti səbəbindən şəhərin əsas hərəkət arteriyalarında sıxlıq müşahidə olunur.

Manevr.az xəbər verir ki, yaranan ləngimələrə yalnız yağış deyil, bəzi sürücülərin diqqətsizliyi də təsir göstərir. Belə ki, sükan arxasında olan bir sıra sürücülərin avtomobil idarə edərkən mütləq olan ara məsafəsini düzgün saxlamaması, hətta sıxlıq olmayan yollarda belə nəqliyyatın normal hərəkət ritmini pozub və süni gərginlik yaradıb. Yağışlı havada tormoz məsafəsinin uzanması və görünüşün məhdudlaşması riskləri daha da artırır.

Yaranmış sıxlıqların və olası yol-nəqliyyat hadisələrinin qarşısının alınması, eləcə də hərəkətin tənzimlənməsi məqsədilə Dövlət Yol Polisi əməkdaşları tərəfindən şəhərin kritik kəsişmələrində və intensiv küçələrində gücləndirilmiş iş rejimində operativ tədbirlər görülür.

Sürücülərdən hava şəraitini nəzərə alaraq sürət həddini minimuma endirmələri, təhlükəsiz ara məsafəsini qorumaları və kəskin manevrlərdən çəkinmələri xahiş olunur.