Dövlət imtahanları ləğv oluna biIərmi? – Təhsil ekspertindən AÇIQLAMA

Manevr.az-ın xəbərinə görə, mövzu ilə bağlı Konkret.az-a danışan təhsil eksperti Elşən Qafarov bildirib ki, tələbələr ətraflı bilik əldə etmək istəmir:
“Azərbaycanda təhsil sahəsində ciddi problemlər var. Bu problemlər təkcə təhsil verənlərlə yox, eləcə təhsil alanlarla bağlıdır. Tələbələrin daha yüngül variantlara əl atmaq niyyəti onların təhsil almaq istəməməsindən irəli gəlir. Təəssüf ki, bu gün ali təhsil müəssisələrində ali təhsilin keyfiyyəti qənaətbəxş deyil. Digər tərəfdən təhsil alanlar nəyin bahasına olursa olsun dərslərin yüngülləşməsini istəyir. Reallıq belədir ki, tələbələr ancaq universitetə gedib gəlmək istəyir, dərs oxumaq yox. Məsələn Türkiyəyə təhsil almağa gedənlərin 70 faizi sonda diplom ala bilmir. Bunun əsas səbəbi tələbələrin Azərbaycandakı təhsil mühitinə öyrəşməsidir. Tələbələr ətraflı bilik əldə etmək istəmir. Sosial şəbəkələrdə dövlət imtahanının ləğvi ilə bağlı tələbələrin səsləndirdiyi fikirləri mən də görürəm. Bu gün əksər tələbələr işə qəbul olmaq üçün repetitor yanına hazırlığa gedir. Görünən odur ki, verilən təhsil qaneedici deyil. Düşünürəm ki, imtahanlar ləğv edilmək əvəzinə daha da ciddi olmalıdır”.

Ekspert dövlət imtahanlarının ləğv edilməsi ilə bağlı bütün fikirlərin əleyhinə olduğunu bildirdi:
“Ümumiyyətlə, qiymətləndirmə sisteminin təkmilləşdirilməlidir. Ali məktəbə qəbul imtahanlarını sadələşdirmək lazımdır. Lakin son mərhələdə diplom yalnız layiqli kadrlara verilməlidir. Təəssüf ki, bizdə vəziyyət əksinədir. Universitetə qəbul imtahanı çox çətindir. Lakin qəbul olan tələblər dörd il universitetə boş yerə gedib-gəlir. Sonda isə onların çoxu diplom alır. Düşünürəm ki, tələbələrin bu etirazlarının heç bir əsası yoxdur. Diplom ən layiqli tələbələrə verilməlidir.