Pakistanı lərzəyə gətirən qətl

Pakistanın Lahor şəhərində dəhşətli qətl hadisəsi baş verib. 16 yaşlı ev qulluqçusu ev sahibi olan xanım tərəfindən qətlə yetirilib. Qətlin səbəbi odur ki, qulluqçu qız ev sahibinin qızının yeməyindən bir qaşıq götürüb, yeyib. Bundan xəbər tutan ev sahibəsi qulluqçuya hücum edib. Əlinə keçən dəmir çubuqla qulluqçunun başına çoxsaylı zərbələr endirib. Bir də görüb ki, qulluqçu ölüb...

Meyiti yaxınlıqdakı kanalizasiya sularının axıdıldığı gölməçəyə atıblar. Bir müddət sonra qulluqçunun cəsədi aşkar edilib.

Hazırda Pakistanda ən çox müzakirə olunan məsələ bu bədbəxt qızın qatilinin cəzalandırılması ilə bağlıdır. Xüsusi ilə sosial şəbəkə istifadəçiləri aktivdir. Onlarln sayəsində bu hadisəyə beynəlxalq səviyyədə maraq yaranıb. Düşünün ki, Pakistanın baş naziri İmran Xan bu məsələ ilə bağlı " Twitter" atıb.

İstintaq müəyyən edib ki, Uzma adlı qulluqçu 8 ay əvvəl işə başlayıb. Mütəmadi şəkildə ev sahibəsi tərəfindən döyülüb, təhqirlərə məruz qalıb. İstintaq Uzmanın bədəninin digər yerlərində də köhnədən qalma yara və kəsik yerləri aşkar edib.

Son dərəcə qəddar olan ev sahibəsi çalışdığı müddətdə qulluqçu qızın öz ailəsi ilə görüşməsinə, hətta onlarla telefonla danışmasına belə icazə verməyib.

O da maraqlıdır ki, Uzmanı öldürən qadın sonra polisə gedib və öz qulluqçusunu oğurluqda suçlayıb. Uzmanın valideynləri Polis İdarəsinə çağırtdırıb və onları yamanlayıb.

İstintaq zamanı evdən hamını şoka salan video-görüntülər üzə çıxıb. Həmin çəkilişlərdə döyülərək ölümün bir addımına gətirilmiş Uzma aydın görünür. Pakistanda insan və qadın haqları uğrunda mübarizə aparan qruplar həmin videonun araşdırılmasını tələb edir. Video harada, nə zaman çəkilib? Bu sualların cavabı istintaq üçün də önəmlidir.

Pakistan xalqını narahat edən əsas məslə odur ki, Uzmanın zülm və zoraklıqla öldürülməsi kimi hadisələr bu ölkədə tez-tez olur. Hətta 11-12 yaşlı uşaqlar da kimlərinsə evində qulluqçu qismində işləyir və oxşar münasibətlə qarşılaşır. Qəddarlıqla öldürülən uşaq-qulluqçular da az deyil.

Hazırda ev sahibəsi bu qətlin ört-basdır edilməsi üçün ona kömək etmiş iki qadınla birlikdə həbs olunub. Pakistan xalqı ölkədə həddi-buluğa çatmamış uşaqların bu kimi işlərə cəlb olunmasına etiraz edir.musavat.com

P.S. Təəssüf ki, həmin video urdu dilindədir. Amma videoda Uzmanın dəhşətli görüntüsü insanı sarsıdır. Düşünün, öncə 15 yaşlı gözəl bir qızın fotosuna baxırsan, sonra isə döyülərək sifəti tanınmaz hala salınmış və daha çox qoca qarıya bənzər birisini görürsüz...

Yazını hazırlayarkən diqqətimi çəkən ikinci məqam isə Pakistanın baş naziri İmran Xanın atdığı " Twitter"də "zülm" sözünü işlətməsi oldu. İngilis dilində yazılmış mətndə məhz bu sözün seçilməsi təsadüfi deyildi.

Manevr.az