Sosial şəbəkələrlə bağlı qanuna ehtiyac varmı?

Tarix: 25-09-2022 14:52 Baxış: 3264 A- / A+

“Sosial şəbəkələr real ictimai münasibətlərimizin virtual inikasıdır. Real həyat üçün tətbiq edilən hüquq sosial şəbəkələrdə də tətbiq olunmalıdır”.

Manevr.az xəbər verir ki, bunu modern.az-a sosial şəbəkələrin hüquqi tənzimlənməsi barədə təkliflərlə münasibət bildirən Milli Məclisin İnsan hüquqları komitəsinin üzvü Hikmət Babaoğlu deyib.

Deputatın sözlərinə görə, həm real, həm də virtual ictimai münasibətlərdə etik qaydaların pozulması, cinayət tərkibli əməllərin törədilməsi, təhqirlərə yol verilməsi kimi məsələlər mütləq hüquqi şəkildə tənzimlənməlidir:

“Virtual aləmdə baş verən hadisələr real həyatda olduğu kimi neqativ tendensiya yaradır. İnsanlar bundan zərər çəkirlər. Mental keyfiyyətlərimizə qədər dəyişikliyə gətirib çıxara biləcək proseslər baş verir. Ona görə də, sosial şəbəkələrdə hüququn tətbiqi çox aktual məsələdir”.

H.Babaoğlu vurğulayıb ki, ancaq bunun müxtəlif tətbiq formaları mövcuddur. Təəssüf ki, bu günə qədər heç bir ölkədə sosial şəbəkələrdəki münasibətləri tam tənzimləyəcək hüquq qaydaları müəyyən edilməyib:

“Bəzi ölkələr real hüququ sosial şəbəkələrə də şamil edən qanun qəbul ediblər. Bununla məsələ qurtarıb. Məsələn, Almaniyada federal qaydaların virtual vasitələrə tətbiqi ilə bağlı qanun mövcuddur. Bütün cəmiyyətdə olan hüquq və hüquqsuzluq sosial şəbəkələrdə baş verirsə, elə həmin qanunlar birbaşa tətbiq olunmaqla oradakı münasibətlər tənzimlənir”.

“Əlbəttə, hazırkı mərhələdə nəzərə alsaq ki, təkcə sosial şəbəkələrdə deyil, digər internet resurslarında da müxtəlif tendensiyalar yaranır, müxtəlif qanun pozuntuları müşahidə olunur. Hesab edirəm ki, sosial şəbəkələr haqqında qanunun qəbul olunması problemlərin həllinə yarımçıq ola bilər. Bu gün müxtəlif bloqlar, internet televiziyalar, teleqram kanalları var ki, bunların hamısını əhatə edəcək universal qanun yaratmaq təcrübəsi dünyada yoxdur. Düşünürəm ki, bu, həm də çətindir. Ən yaxşı yollardan birini almanlar tapıblar. Federal qanunları bütün sosial şəbəkələrə və internet resurslarına tətbiq edirlər. Lakin dünya hələ axtarışdadır. Bu məsələlər şübhəsiz Azərbaycan üçün də aktualdır. Bu baxımdam məsələlərin ictimai müzakirəyə çıxarılması lazımdır. Birinci ona görə ki, sosial şəbəkə istifadəçiləri yəqin edəcəklər oradakı davranışları problem yaratdığı üçün hüquq kontekstdə qiymətləndirilməsi aktuallaşır. Bu, özü maarifləndirmə metodu olacaq. İkincisi, sözün həqiqi mənasında münasibətlərin tənzimlənməsinə ehtiyac var”,- deyə H.Babaoğlu bildirib
Qeyd edək ki, son günlər sosial şəbəkələrin hüquqi baxımdan tənzimlənməsi üçün yeni qanun layihəsinin qəbul olunması barədə təkliflər gündəmə gətirilib. Hesab edilir ki, sosial şəbəkələrdəki neqativ halların qarşısını yalnız qanunvericilik çərçivəsində almaq mümkündür. Bu təklif birmənalı qarşılanmır. Bəzi vətəndaşların fikrincə, sosial platformalar azaddır, orada məhdudiyyətlər tətbiq etmək yolverilməzdir.

Manevr.az