"Attestasiya məsələsi qabardılıbsa, o zaman Milli Məclisdə də attestasiya keçirmək lazımdır”.

Manevr.az xəbər verir ki, bu sözləri bakubost-a açıqlamasında media eksperti Zeynal Məmmədli jurnalistlərin attestasiyadan keçirilməsi məsələsinə münasibət bildirərkən deyib. O, deputatların da bəzi nüansları səhv saldıqlarına diqqət çəkib: "Deputatların sözlüyü, danışıq tərzi, cümlə quruluşu... Hamısı yoxlanılsın və attestasiyada keçirilsin. Baxırsan 100 ilin millət vəkilidir, akademikdir, amma yaşayış minimumu ilə minimum əmək haqqını qarışdırır. Bu daha böyük bəladır, nəinki aparıcıların danışığı”.

Jurnalistlərin biliklərinin yoxlanılması məsələsinə gəlincə, media eksperti hesab edir ki, nəticəyə yox, səbəbə köklənmək lazımdır: "Araşdırmaq lazımdır ki, aparıcılar niyə belə danışırlar? Niyə bu sözlərdən istifadə edirlər? Niyə bayağı verilişləri aparmağı özlərinə rəva görürlər? Buna kimi getmək olar. Məsələnin kökünə baxanda isə işsizlik çıxacaq, iş tapmaq şansının azlığı çıxacaq, qeyri-peşəkarlığın bəla sayılmaması çıxacaq. Bunun da kökündə ifadə azadlığı durur. Əslində çox ciddi və aktual problemlər var. Bu tipli məsələlərlə bağlı maraqlı diskussiyalar, debatlar edəndə orada ədəbsiz sözlərə, şpaqatlara ehtiyac qalmır və yer olmur. Orada problemi araşdırmağa, mövcud durumu dəyərləndirməyə ehtiyac var.

Bundan başqa, biz çox tərbiyəli, ədəbli sözlərdən istifadə edərək yalan danışırıqsa, yalan informasiya veririksə, bu daha çox ziyanlıdır, yoxsa mədəniyyətsiz, ədəbsiz şəkildə başqa bir şeydən danışmaq? Hansı cəmiyyət üçün daha çox ziyanlıdır? Bunlar mübahisə oluna bilən mövzulardır”.

Ekspert attestasiya məsələsinin mexanizm olmadan gerçəkləşməsinin çətin olacağını hesab edir: "Həm də müəyyən etmək lazımdır ki, bir TV nə istəyir? Hədəfi nədir, hansı tamaşaçıya üz tutur? Bütün bunlar aparıcının davranışını da, nitqini də müəyyənləşdirən şərtdir.

Bütün bu məsələləri çözmək olar, müxanizmini də hazırlamaq olar, amma təki səmimi istək olsun, peşəkarlığa qiymət verilsin , məsələnin kökündəki ifadə azadlığına sayğı olsun”.

Qeyd edək ki, Azərbaycan Prezidentinin "Azərbaycan dilinin saflığının qorunması və dövlət dilindən istifadənin daha da təkmilləşdirilməsi ilə bağlı tədbirlər haqqında” imzaladığı fərmana əsasən İşçi qrupu "Azərbaycan dilinin saflığının qorunması və dövlət dilindən istifadənin daha da yaxşılaşdırılması ilə bağlı Tədbirlər Planı”nı hazırlayaraq Azərbaycan Milli Elmlər Akademiyasının (AMEA) Rəyasət Heyətinə təqdim edib. Tədbirlər Planında "Radio, televiziya, qəzet, jurnal redaksiyalarında, internet saytlarında çalışan yaradıcı əməkdaşların ədəbi dil bilikləri üzrə vaxtaşırı attestasiyalarının keçirilməsi” barədə bənd də yer alıb. Dövlət Dil Komissiyasının üzvü, Azərbaycan Milli Elmlər Akademiyasının (AMEA) Nəsimi adına Dilçilik İnstitutunun direktoru, Azərbaycan dilinin saflığının qorunması və dövlət dilindən istifadənin daha da yaxşılaşdırılması ilə bağlı Tədbirlər Planı”nı hazırlamaq üçün yaradılan İşçi qrupunun sədri Möhsün Nağısoylu BakuPost-a açıqlamasında deyib ki, daha çox tənqidlərlə üzləşən teleaparıcıların attestasiyadan keçirilməsinə ehtiyac var, çünki problemlər daha çox teleməkanda, şifahi nitqdə özünü göstərir. Onun sözlərinə görə, əgər təklif qəbul olunsa, Dövlət İmtahan Mərkəzi jurnalistlərin, xüsusən teleaparıcıların, internet saytlarında çalışan jurnalistlərin bilik səviyyəsini yoxlaya, məsələn, inşa yazdıra bilər.