“Azərbaycan Respublikasının vətəndaşlarına layiqli həyat səviyyəsinin təmin edilməsi dövlətin ali məqsədidir”.
Bu sözləri Yenisabah.az-a açıqlamasında Milli Məclisin deputatı Bəhruz Məhərrəmov deyib.
O, Rusiya-Ukrayna müharibəsi fonunda baş verən qiymət artımını, o cümlədən Azərbaycan dövlətinin ərzaq təhlükəsizliyi bağlı olan siyasətini şərh edib.
Həmsöhbətimizin sözlərinə görə, Azərbaycan Prezidenti də bu istiqamətdə bütün mümkün imkanlardan maksimum istifadə edir, aidiyyəti tədbirlər görür:
“Görülən işlərin heç şübhəsiz ki, ən vaciblərindən biri kənd təsərrüfatı sahəsinin inkişafına nail olmaqdır və açığı, son illər bu sahədə köklü dəyişikliklərin şahidi olmaqdayıq. Bu gün qeyri-neft sektorunun inkişafını hədəfləyirik və statistikaya baxsaq, ötən ilin birinci rübü ilə müqayisədə qeyri-neft iqtisadiyyatımız 10 faizdən çox, qeyri-neft ixracımız isə 45 faiz artıb. Bu rəqəmlərdə öncül yerlərdən biri məhz kənd təsərrüfatının payına düşür.
Prezident İlham Əliyevin sədrliyi ilə bu ilin birinci rübünün yekunlarına həsr olunan müşavirədə də qeyd edildiyi kimi, “ərzaq təhlükəsizliyi proqramı çərçivəsində, əsasən də dünyadakı ərzaq problemləri ilə əlaqədar cari ilin birinci rübündə 220 milyon manat vəsait ayrılıb. Bu da kənd təsərrüfatı sahəsinə müəyyən əkin subsidiyalarının verilməsi ilə bağlıdır”.
B. Məhərrəmov əlavə edib:
“Əlbəttə, çoxsaylı statistik nümunələr ortaya qoymaq olar, lakin ən vacib göstərici o olub ki, pandemiya və pandemiyadan doğan qlobal iqtisadi böhran, o cümlədən çox böyük maliyyə vəsaiti tələb edən V nəsil müharibədən çıxmağımıza baxmayaraq, ölkədə heç bir formada qıtlıq hiss edilmədi. Elə Ukrayna nümunəsinə də diqqət edək. Baxmayaraq ki, bütün dünya dayanmadan yardım edir, amma orada bölgələr var ki, insanlar minimum ərzaq ehtiyaclarını ödəyə bilmir. Bu bir daha onu göstərir ki, Azərbaycanda həyata keçirilən siyasətə alternativ yoxdur”.
Milli Məclisin deputatı onu da vurğulayıb ki, problemlər də var:
“Məsələn, mən təmsil etdiyim bölgə üzrə bəzi problemləri sadalaya bilərəm ki, bu, bir sıra digər regionlarımız üçün də analogiya təşkil edə bilər. Biləsuvarda kənd təsərrüfatının inkişafı üçün ən ciddi əngəl su çatışmazlığı ilə bağlıdır. Bilirsiniz ki, hazırda dövlət proqramı qəbul edilib və müasir texnologiyaların və üsulların tətbiqi ilə bağlı iş aparılır. İnanıram ki, yaxın illər ərzinə biz həlli yolunu tapacağıq”.
“Bundan başqa, qlobal böhranın təsiri ilə bahalaşma kənd təsərrüfatı sektoruna da təsir edib və xüsusən, gübrə və digər vasitələrdəki bahalaşma əlavə problemlərə yol açmaqdadır. Amma nəzərə alaq ki, Azərbaycanda subsidiya sistemi tətbiq edilir ki, bu da fermerlərin müvəqqəti perioddan minimum itki ilə çıxmasına imkan yaradacaq.
Təbii ki, əsas olan siyasi iradədir ki, Azərbaycanda kənd təsərrüfatının inkişafı ilə bağlı ciddi siyasi iradə var, təmsil etdiyim bölgədə fermerlər də bunu bilir və real vəziyyəti qiymətləndirirlər”, - deyə müsahibimiz fikirlərini yekunlaşdırıb.

Manevr.az