Ailəsini məhv edən Əhmədin ifadəsi: “Onlara nifrət edirdim...”

Manevr.az lent.az-a istinadən xəbər verir ki, bu ilin ölkə gündəmini uzun müddət zəbt edən dəhşətli cinayəti Bakı Ağır Cinayətlər Məhkəməsində hakim Səbinə Məmmədzadənin sədrliyi ilə araşdırılır.
Bu gün prosesdə baxış iclası keçirilib. Prokuror ittiham aktını elan edib.
Ə.Əhmədov istintaqa verdiyi ifadəsində göstərib ki, uşaqlıqdan psixoloji vəziyyətinin normal olmayıb, balacalıqdan şizofreniyadan əziyyət çəkib. Bununla yanaşı, orta məktəbdə 9-cu sinfə kimi oxuyub, hərbi xidmətə yararsız hesab edilib. Yaxınlarının köməkliyi ilə Moskva şəhərindəki universitetlərdən birində ali təhsil alıb. İlkin ifadəsində ailə üzvlərini öldürməsinin səbəbini isə onu ailədən saymamaları, diqqət göstərməmələri ilə əlaqələndirib.
İttiham aktına görə, ailəsi onun tək yaşamağı üçün ayrıca ev alıb. Tək yaşadığı üçün ailəsi ilə normal münasibəti olmayıb, özünü hər zaman tək hiss edib.
Səhər yeməyi zamanı Əhməd atasını öldürmək fikrinə düşüb: 
“Evdə atamla ikimiz idik. Birdən ağlıma gəldi ki, onu öldürüm. Mətbəxdən bıçağı götürüb bir neçə zərbə vurdum. Öldükdən sonra  onun avtomobilinin açarını götürüb aşağı düşdüm. Maşına əyləşib birbaş Suraxanıda yaşayan bacım Elmiranın evinə getdim. Elmira qapını açan kimi əlimdəki bıçaqla onu da öldürdüm. Bacımın azyaşlı uşağını da öldürmək fikrində idim. Hadisəni törətdikdən sonra bıçaqları meyitlərin yanına atıb öz evimizə qayıtdım. Ürəyim siqaret istədi deyə, mağazaya getdim. Amma satıcı əlim qan olduğu üçün vermədi".
Onun sözlərinə görə, Əhməd marketdən çıxanda anası ilə qardaşı Məhəmmədlə qarşılaşıb:
“Onların evə gəldiklərini gördüm. Mağazadan balta almışdım. Birinci anamı, sonra qardaşımı öldürdüm. İşimi bitirdikdən sonra baltanı evin şkafında gizlədib aşağı düşdüm. Həmin vaxt ərazidə polis əməkdaşları var idi. Məni tutdular”.
Ə.Əhmədov deyib ki, məni ailədən saymadıqları üçün onlara nifrət edirdim:
“Atam, anam və bacımın məni ailədən saymamaları, diqqət göstərməmələri, ayrı yaşamaq istəmələri məndə onlara qarşı nifrət yaratmışdı. Qardaşımın və bacım qızının da gələcəkdə valideynləri kimi olacağını düşündüyüm üçün onları da öldürdüm ki, rahatlıq tapım. Daxilimdən gələn səs də onları öldürməli olduğumu deyirdi".
Prokurorun çıxışı ilə məlum olub ki, Əhməd anasını öldürərkən qonşuluqdakı qadın şahid olub:
“Əhməd qadını təhqir edərək yaxın durmamasını əmr edib. Qonşu qadın evə qaçaraq polisə məlumat verib. 
Zərərçəkmiş şəxslərdən birinin yaxınını istintaqa verdiyi ifadəsində göstərib ki. hadisə baş verən gün atası Əhmədi Mərdəkanda yerləşən reabilitasiya mərkəzinə aparacaqmış. Oğlu ilə də bu səbəbdən görüşübmüş”.
Daha sonra, Ə.Əhmədov özünü hadisə üzrə təqsirli bilib. Hadisəni özünün törətdiyini etiraf etdi. Və o, ifadə verməkdən imtina edib.
Proses iyulun 23-nə qədər təxirə salınıb.
Qeyd edək ki, məhkəmə psixiatrik ekspertizasının rəylərinə əsasən, Ə.Əhmədovun hadisəni anlaqsız vəziyyətdə törətməsi məlum olub. Rəydə qeyd edilib ki, təqsirləndirilən şəxsin psixoloji vəziyyəti onunla istintaq hərəkətlərinin aparılmasına imkan vermir. Hadisəni törətdikdən dərhal sonra şübhəli şəxs qismində saxlanılan Ə.Əhmədov istintaqa ailəsini öldürməsi barədə danışıb.