Ermənistan Baş naziri Nikol Paşinyan Qarabağdakı separatçı rejimi Azərbaycana yeni hərbi eskalasiyaya başlamağa əsas yaradan açıqlamalar verməməyə çağırıb.
Manevr.az teleqraf.com-a istinadən bildirir ki, o, bu barədə Ermənistan hökumətinin iclasında danışıb.
"Vəziyyəti daha da çıxılmaza salan siyasi bəyanatlardan qaçmaq lazımdır, çünki son nöqtəyə çatmaq üçün aydın baxışı olmayan bəyanatların heç bir faydası olmayacaq. Qarabağla (separatçı rejimlə - red.) Azərbaycan arasında siyasi dialoq başlamalıdır", - Paşinyan bildirib.
Baş nazir vurğulayıb ki, Azərbaycana qarşı çağırışlar yeni hərbi toqquşmalara yol aça bilər, bunun baş verməməsi üçün bu kimi açıqlamalardan uzaq durmaq lazımdır.
Qeyd edək ki, separatçı rejimin nümayəndəsi Ruben Vardanyan son günlərdə tez-tez Azərbaycan əleyhinə açıqlamlar verir. O, son açıqlamasında Azərbaycanla "döyüşməyə" hazır olduqlarını da deyib.