Sumqayıtda şəhid Elnur Allahverdizadənin anım günü keçirilib

Bu münasibətlə  Milli Məclisin deputatı Müşfiq Məmmədli, Bakı Slavyan Universitetinin rektoru hörmətli Anar Nağıyev,  qəhrəman şəhidimizin ailə  üzvləri, qohumları və dostları Sumqayıtdakı şəhidlər xiyabanında olub, Elnurun xatirəsini hörmətlə anıblar. Daha sonra şəhidin ildönümü ilə əlaqədar keçirilən tədbirdə iştirak edib, onun həyat yoluna nəzər salıblar. 

Qeyd edək ki, Elnur Allahverdizadə 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində könüllü topçu olaraq iştirak etmişdir. Ağdamın və Xocavəndin azadlığı uğrunda gedən döyüşlərdə vuruşmuşdur. Elnur Allahverdizadə 7 noyabr 2020-ci ildə Ağcabədi rayonunun Yuxarı Qiyaməddinli kəndi istiqamətində döyüş tapşırığının yerinə yetirilməsi zamanı həlak olmuşdur.8 noyabr 2020-ci ildə Sumqayıt Şəhidlər Xiyabanında dəfn olunmuşdur.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin Sərəncamlarına əsasən Elnur Allahverdizadə ölümündən sonra "Vətən uğrunda",  "Cəsur döyüşçü" və "Xocavəndin azad olunmasına görə" medalı ilə təltif edilib.