30 il Azərbaycan ərazilərini işğalda saxlayan və heç bir beynəlxalq hüquqa əməl etməyən Ermənistan yenə də təxribatlardan əl çəkmir. 44 günlük Vətən Müharibəsində Azərbaycan özünün beynəlxalq birlik tərəfindən tanınan ərazi bütövlüyünü təmin etdi. Bundan sonra bölgədə yeni bir reallıq yarandı. Azərbaycan iki ölkə arasında düşmənçiliyə son qoymaq və bölgədə daimi sülhün formalaşması üçün Ermənistana sülh təklif etdi. Bu müstəvidə iki ölkə arasında Moskva və Brüssel formatlarında görüşlər, danışqlar aparıldı və müəyən razılaşmalar əldə edildi. Amma hər zaman olduğu kimi məkirli xislətinə sadiq olan erməni tərəfi növbəti dəfə açıq şəkildə təxribatlara əl ataraq yenidən gərginliyin davam etməsinə yol açır.
Bunu Ermənistanın Kəlbəcər, Laçın və Daşkəsən istiqamətində təxribatlarını şərh edən Milli Məclisin deputatı Aqil Məmmədov deyib.

O qeyd edib ki, son bir ay ərzində Ermənistan silahlı qüvvələrinin dövlət sərhədinin Laçın və Kəlbəcər rayonları istiqamətində təxribatları mütəmadi olaraq davam edir: “Azərbaycan Ordusunun həmin rayonların ərazisindəki mövqeləri Ermənistan tərəfindən atəşə tutulması halları intensiv və sistematik xarakter daşıyır. Bir neçə halda Ermənistan silahlı qüvvələrinin kəşfiyyat-diversiya qruplarının Azərbaycan ərazisinə sızma cəhdləri müəyyən edilib. Azərbaycan əsgərinin ayıq-sayıqlığı nəticəsində onların qarşısı alınıb. Eyni zamanda Ermənistan tərəfindən Azərbaycan sərhədləri boyunca hücum təyinatlı silahlar, ağır artilleriya vasitələrini və şəxsi heyəti cəmləşdirməsi növbəti dəfə təxribata hazırlıq məqsədi güdüb”.
Millət vəkili hesab edir ki, Ermənistanın yüksək çinli rəsmi şəxslərinin verdikləri açıqlamalara baxmayaraq, Ermənistan silahlı qüvvələrinin şəxsi heyətinin və hərbi texnikasının Rusiya sülhməramlılarının müvəqqəti yerləşdiyi Azərbaycan ərazilərində hələ də mövcuddur: “Hələ də Azərbaycanın suveren ərazilərində qanunsuz erməni hərbi birləşmələri ilə birgə fəaliyyətini davam etdirir. Eyni zamanda Azərbaycan tərəfindən Qarabağ və Şərqi Zəngəzurda Ermənistanın otuz illik işğalının nəticəsi olaraq, genişmiqyaslı və çətin humanitar mina təmizləmə fəaliyyəti aparılır. Amma buna baxmayaraq Ermənistan tərəfindən yenə də Azərbaycan ərazilərində qəsdən mina basdırılması əməlləri davam edir”.
Aqil Məmmədov Ermənistanın hərbi-siyasi rəhbərliyinin hərbi avantüralarının qəsdən regionda vəziyyəti gərginləşdirməyə hesablandığını söyləyib: “Məqsəd sülh müqaviləsi üzrə danışıqların baş tutmasını pozmaq, 10 noyabr 2020-ci tarixli üçtərəfli bəyanat üzrə öhdəlikləri yerinə yetirməkdən boyun qaçırmaqdır. Bununla yanaşı Ermənistan tərəfi Azərbaycanın Qarabağ və Şərqi Zəngəzurda apardığı tikinti-quruculuq layihələrini ləngitmək niyyətindədir. Qarşı tərəf bu cür gərginlik yaratmaqla Ermənistan əhalisini və beynəlxalq ictimaiyyəti çaşdırmağa cəhd edir”.

Millət vəkili Cavid Osmanov hesab edir ki, Ermənistan bir dövlət olaraq heç vaxt götürdüyü öhdəliklərə sadiq olmayıb: “Son Brüssel görüşündə əldə edilən razılaşmalara da Ermənsitanın necə riayət etdiyini dünya ictimaiyyəti bir daha görmüş oldu. Çünki bu dövlət regionda sülh və təhlükəsizliyin olmasında maraqlı deyil. Müəyyən dairələrin və qüvvələrin əlində oyuncaq olan Ermənistan Azərbaycanın yaratdığı yeni reallığı qəbul etmək istəmir”.
Deputat qeyd edib ki, hazırda yaranmış vəziyyətə görə bütün məsuliyyət Ermənistanın hərbi-siyasi rəhbərliyinin üzərinə düşür: “Qarşı tərəf heç vaxt bir dövlət kimi məsuliyyətini dərk etməyib. Gərginlik yaratmaq və bunun fonunda hansısa ümidlərə qapılmaq Ermənistan dövlətinin çoxdankı xislətidir. Onlar düşünür ki, kimlərsə belə şəraitdə prosesə qoşula bilər. Amma növbəti dəfə yanılırlar. Bu gün Cənubi Qafqazda güc faktoru və prosesləri diktə edən tərəf Azərbaycandır. Azərbaycanın hərbi-siyasi gücü qarşısında Ermənistan və onun havadarlarının bu bölgədə yenidən gərginlik yaratmaq cəhdləri baş tutmayacaq. "Dəmir yumruq" yerindədir. Ermənistan hər təxribatında aldığı cavabla "Dəmir yumruğ"un hər an onun istənilən riyakar davranışına qarşı zərbə olacağını birdəfəlik dərk etməlidir”.
Cavid Osmanova görə, Azərbaycan Ordusu hər zaman olduğu kimi Ermənistanın təxribatlarının, ölkəmizin ərazi bütövlüyü və suverenliyinə olan təhlükələrin qarşısını almaq üçün zəruri tədbirlər görür: “Bütün bunlar ona dəlalət edir ki, Azərbaycan sərhədinin yaxınlığında təhlükəsiz zona yaradılmalıdır. Əks təqdirdə Ermənistanın bu kimi təxribatları davam edəcək. Eyni zamanda Ermənistan sülhə məcbur edilməlidir. Bütün bunlarla yanaşı Ermənistanda revanşizmin baş qaldırmasına imkan vermək olmaz”.

Manevr.az