Azərbaycan Yazıçılar Birliyində Bakının neft milyonçusu, tacir və mesenat - xeyriyyəçi Ağa Musa Nağıyevin 175 illik yubileyinə həsr olunmuş “Tarix yaşadan binalar” adlı kitabın təqdimatı keçirildi.
     Tədbiri giriş sözü ilə açan Azərbaycan Yazıçılar Birliyinin sədr müavini Rəşad Məcid iştirakçıları salamlayaraq öz adından, həmçinin birliyin sədri Anar Rzayevin və katibliyin adından sanballı nəslin nümayəndəsi Ağa Musa Nağıyevin nəvəsi Dilarə Nağıyevanı yeni kitabı münasibətilə təbrik etdi, dərin hörmət və ehtiramlarını çatdırdı. Rəşad Məcid Bakının  məşhur on bir milyonçusu arasında birinciliyi qazanan Ağa Musa Nağıyevin xalqı üçün tikdirdiyi, müasir dövrümüzə qədər əsrarəngiz gözəlliyini itirməyən qədim binalardan danışdı.
     Ağa Musa Nağıyevin və bütün şəhidlərin əziz xatirəsi bir dəqiqəlik sükutla yad edildi.
     Tədbiri davam etdirən aparıcı ictimai xadim Hacı Quliyev təqdim edilən kitabın ərsəyə gəlməsindən və toplanan materialların oxucular üçün dəyərli olmasından bəhs edərək kasıb kəndli balası Ağa Musa Nağıyevin saman satmaqdan milyonçu olana qədər keçdiyi ömür yolu və xalqının rifahı naminə əvəzsiz xidmətləri haqqında geniş məlumat verdi.
     Kitabın  müəllifi tarix elmləri üzrə fəlsəfə doktoru, alim , “Milli Dəyərlərin Qorunması” İctimai Birliyinin (QHT) təsisçisi və  sədri, bir çox dövlət mükafatlarına layiq görülən Dilarə Nağıyeva sayca 10-cu olan bu kitabını babası Ağa Musa Nağıyevin və atası Fərəc Nağıyevin uzun müddət  tədqiq edilməmiş çoxşaxəli fəaliyyətlərini araşdırmaq  məqsədilə yazdığını vurğuladı. Babasının adını özünə təxəllüs götürən və xeyriyyəçilik əməllərini davam etdirən Dilarə Nağıyeva təqdimata toplaşan elm adamları, ziyalılar, şəhid ailələri, qazi və digər kitabsevərlər üçün bu kitabın maraqlı və oxunaqlı olacağına əminliklə yanaşaraq ünvanına yönələn təbriklərə, xoş arzu və diləklərə görə onlara dərin minnətdarlığını bildirdi.
     Tədbirdə Bakı Dövlət Universitetinin professoru Jalə Əliyeva, xeyriyyəçi, ictimai xadim Hacı Nuran, Respublika Qadınlar Cəmiyyətinin sədri Bahar Qasımova, tanınmış şair Aləmzər Sadıqqızı, yazıçı-publisist, jurnalist Rəna Təbəssüm və başqaları çıxış edərək kitabla bağlı fikirlərini bölüşdülər və müəllifə uğurlar arzuladılar.  İctimai fəallığı ilə seçilənlər “Ağa Musa Nağıyev” adına diplomla mükafatlandırıldı. Möhtəşəmliyi ilə yaddaqalan  kitab təqdimatının sonunda xatirə şəkilləri çəkildi.
     Ömürlərə işıq saçan milyonçu, tacir və mesenat - xeyriyyəçi Ağa Musa Nağıyevin adını yaşadan, xalqına miras qalan,  bu gün də istifadədə olan tikdirdiyi 98 bina həqiqətən, tarix yaşadır. Bu binaların əksəriyyətinin üzərində adının baş hərfləri - M.N. həkk olan daş kitabələr mövcuddur ki, ondan qalan silinməz  nişanə  kimi qəbul olunur.  Milyonçunun varlığı bu gün də tarix yaşadan binaların hər bir daşında hiss olunur.
     Bəli, sadə kəndli balası, milyonçu Ağa Musa Nağıyev tikdi ki bu günə də, sabaha da izi qala...

    P.S. Milyonçu, xeyriyyəçi babası Ağa Musa Nağıyevin 175 illik yubileyinə həsr etdiyi “Tarix yaşadan binalar” adlı kitabda “Borcu ödəmək şərəfi” adlı müsahibəmə yer verdiyinə görə,
müəllif tarix elmləri üzrə fəlsəfə doktoru Dilarə Nağıyevaya təşəkkür edirəm.

     Rəna TƏBƏSSÜM
     Yazıçı-publisist, jurnalist,
Mahmud Kaşğari mükafatçısı