Noutbukun klaviaturası zamanla toz, qırıntılar və bakteriyaların toplandığı yerlərdən birinə çevrilir.
Manevr.az-ın xarici mediaya istinadən məlumatına görə, cihazın təmiz və gigiyenik qalması üçün klaviaturanı mütəmadi olaraq təmizləmək tövsiyə olunur.
Təmizliyə başlamazdan əvvəl noutbuku söndürün və elektrik şəbəkəsindən ayırın. Model imkan verirsə, batareyanı da çıxarın. Bu, təsadüfi düymə basmalarının və rütubətin yaratdığı qısaqapanma riskinin qarşısını alır.
Klaviaturanı necə təmizləmək lazımdır?
İlk növbədə iri qırıntıları və tozu çıxarın. Bunun üçün noutbuku ehtiyatla klaviaturası aşağı vəziyyətdə çevirin və yüngülcə silkələyin. Bu üsul düymələrin arasında qalan iri çörək qırıntıları və tozun çıxmasına kömək edir. Sonra sıxılmış hava balonundan istifadə edin.
Bu, klaviaturadakı çirki təmizləməyin ən effektiv üsullarından biridir. Balonu təxminən 45 dərəcə bucaq altında tutaraq düymələrin arasını soldan sağa doğru üfürün. Ucluğu düymələrə çox yaxınlaşdırmayın, çünki güclü hava axını onların mexanizminə zərər verə bilər. Qalan xırda toz və tükləri təmizləmək üçün yapışqan lentdən və ya elektronika üçün nəzərdə tutulmuş xüsusi təmizləyici "slime"dan istifadə edə bilərsiniz.
Yapışqan lentin yapışqan hissəsini düymələrin üzərində ehtiyatla gəzdirmək kifayətdir. Xüsusi təmizləyici gel isə çatlara daxil olaraq çirki özünə çəkir. Əsas çirk təmizləndikdən sonra səthi silmək lazımdır. Mikrofiber salfeti az miqdarda izopropil spirti ilə nəmləndirin və düymələrin üst hissəsini, həmçinin aralarını ehtiyatla silin.
Spirti və ya digər mayeni birbaşa klaviaturaya püskürtmək olmaz. Sonda əlçatmaz yerləri pambıq çubuqla təmizləyin. Çubuğu çox az miqdarda izopropil spirti ilə isladaraq qalan ləkələri və yapışmış çirkləri diqqətlə silin.
Bunları etmək olmaz
Klaviaturanı adi su ilə təmizləmək qətiyyən məsləhət görülmür. Düymələrin altına düşən az miqdarda su belə kontaktların korroziyaya uğramasına və ana platanın zədələnməsinə səbəb ola bilər. Məişətdə istifadə olunan yuyucu vasitələrdən də istifadə etmək olmaz. Onların tərkibindəki kimyəvi maddələr plastikin rəngini dəyişə, səthi yapışqan hala gətirə və düymələrin üzərindəki hərflərin silinməsinə səbəb ola bilər.
Zərurət olmadıqca düymələri çıxarmağa da çalışmayın. Müasir noutbuklarda düymələrin bərkidici mexanizmləri çox həssasdır və təcrübəsiz şəkildə sökülməsi onların qırılması ilə nəticələnə bilər.
Bu qaydalara əməl etsəniz, klaviaturanı cəmi bir neçə dəqiqəyə təhlükəsiz şəkildə təmizləyə bilərsiniz. Mütəxəssislər belə təmizliyi təxminən iki həftədən bir etməyi tövsiyə edirlər. Bu, noutbukun daha gigiyenik qalmasına və uzun müddət problemsiz işləməsinə kömək edəcək.lent.az

Manevr.az