Ən etibarsız yapon avtomobilləri - Ekspertlər açıqladı

Bir çox avtomobil həvəskarı yapon istehsalçılarının dünyada ən etibarlı avtomobillər istehsal etdiyini düşünür. Lakin, mütəxəssislərin fikrincə, bu markalar da bəzən uğursuz modellər təqdim edir.
Manevr.az valyuta.az-a istinadən xəbər verir ki, "Jalopnik" nəşri "Consumer Reports" təşkilatının araşdırmasına əsaslanaraq ən etibarsız yapon avtomobillərinin siyahısını tərtib edib. Ekspertlər bildiriblər ki, bu modellərdə ciddi nasazlıqların yaranma ehtimalı kifayət qədər yüksəkdir.
Ən etibarsız yapon avtomobilləri
"Honda Prologue" / "Infiniti QX80"
Elektrikli krossover "Honda Prologue" və iri yolsuzluq avtomobili "Infiniti QX80" ən etibarsız modellər arasında göstərilib. "Honda Prologue" "Chevrolet Blazer EV" platforması üzərində qurulub.
"Infiniti QX80" isə yüksək qiymətinə baxmayaraq, "Land Rover Range Rover" və "Mercedes-Benz GLS" kimi aşağı etibarlılıq göstəricisinə malik modellərlə eyni səviyyədə qərarlaşıb.
"Mazda CX-90" / "Mazda CX-70"
Bu krossoverlər daha da zəif etibarlılıq göstəriciləri ilə diqqət çəkiblər. Ekspertlər onların müxtəlif texniki problemlərlə üzləşdiyini qeyd edirlər.
"Toyota Tacoma"
Uzun illər etibarlılıq nümunəsi hesab edilən "Toyota Tacoma"nın son nəsli bu reputasiyanı sarsıdıb. "Consumer Reports" məlumatına görə, yeni "Tacoma" etibarlılıq baxımından "Ford Ranger", "Honda Ridgeline" və "Jeep Gladiator" modellərindən geri qalır.
Bundan başqa, model üç dəfə geri çağırılıb – bunların arasında kardan valında qüsur və əyləc mayesinin sızması kimi problemlər də var.
"Nissan Frontier"
"Nissan Frontier" də etibarsız pikaplar sırasında yer alıb. 2022-ci ildə modelin yenilənməsindən sonra vəziyyət daha da pisləşib. "Consumer Reports" əsas problemi zəif yığım keyfiyyəti kimi göstərib.
"Mazda CX-90 Plug-in Hybrid" / "Mazda CX-70 Plug-in Hybrid"
Ekspertlər qeyd edirlər ki, avtomobildə nə qədər çox texnoloji detal varsa, nasazlıq riski bir o qədər artır. Məhz buna görə də bu hibrid modellər etibarlılıq baxımından siyahının sonlarında yer alıblar.
"Consumer Reports"un yekun rəyinə əsasən, bu modellər bütün yapon avtomobilləri arasında ən aşağı proqnozlaşdırılan etibarlılıq göstəricisinə malikdirlər.