Emin Ağalarovun şirkəti "Rusiya ordusu" adlı enerji içkisi istehsal edir

Emin Ağalarova məxsus “Uni Pak” MMC avqustun 20-də enerji içkilərinin buraxılışı üçün uyğunluq bəyannaməsi alıb. Söhbət “Rusiya Ordusu. Klassik dad” ticarət markası altında içkilərin seriyalı istehsalından gedir.
Rusiya mediası xəbər verir ki, bu barədə Rosakkreditasiyanın məlumatlarında bildirilir.
İçkilər 0,2–0,5 litr həcmli alüminium bankalarda istehsal oluna bilər. “Uni Pak”ın kommersiya direktoru Aleksandr Çirkov bildirib ki, bəyannamələrin rəsmiləşdirilməsi müntəzəm istehsal proseslərinin bir hissəsidir.
“Uni Pak” Moskva vilayətinin Mojaysk şəhərində yerləşən “Spaso-Borodinskiye vodi” zavodunu idarə edir. Orada müqavilə əsasında Rusiya və beynəlxalq şirkətlər üçün içkilər istehsal olunur, məhsullar federal şəbəkələrə və 23 ölkəyə göndərilir.
“Rusiya Ordusu” enerji içkiləri hazırda bəzi Moskva “Voentorg” mağazalarında satışdadır. Bu şəbəkə Müdafiə Nazirliyinin nəzarətindədir. Nazirlik həmçinin əsas istehsal sinifləri üzrə “Rusiya Ordusu” ticarət nişanına sahibdir.