Qeysəriyyə əməliyyatı uşaqlarda xərçəng riskini artırır - XƏBƏRDARLIQ

İsveçdə yerləşən Karolinska İnstitutunun alimləri planlı qeysəriyyə əməliyyatı ilə dünyaya gələn uşaqlarda kəskin limfoblast leykoz (KLL) inkişaf riskinin daha yüksək olduğunu müəyyən ediblər. Bu qan xərçəngi uşaqlarda ən çox rast gəlinən formadır. 
Manevr.az qaynarinfo-ya istinadən xəbər verir ki, araşdırmanın nəticələri "International Journal of Cancer" (IJC) jurnalında dərc olunub.

Tədqiqat çərçivəsində 1982–1989 və 1999–2015-ci illər arasında İsveçdə doğulmuş təxminən 2,5 milyon uşağın məlumatları təhlil edilib. Bu uşaqların 15,5%-i (təxminən 376 min nəfər) qeysəriyyə əməliyyatı ilə dünyaya gəlib. Onlardan 1495 nəfərinə sonradan leykoz diaqnozu qoyulub.

Ən çox KLL halı planlı qeysəriyyə ilə doğulan uşaqlar arasında qeydə alınıb – yəni doğuş başlamadan əvvəl həyata keçirilən əməliyyatlarda. Belə hallarda KLL inkişaf riski təbii doğuşla doğulan uşaqlarla müqayisədə 21% daha yüksək olub. Xəstəliyin ən geniş yayılmış növü olan B-hüceyrəli kəskin limfoblast leykozun (B-KLL) inkişaf riski isə 29% artıb.
Alimlərin fikrincə, planlı və təcili qeysəriyyə əməliyyatları arasındakı fərqlər immunoloji mexanizmlərlə izah oluna bilər. Belə ki, təcili qeysəriyyə adətən doğuş fəaliyyətinin artıq başladığı hallarda həyata keçirilir. Bu zaman uşaq həm fizioloji stress yaşayır, həm də ananın doğuş yollarının mikroflorası ilə təmasda olur. Planlı qeysəriyyədə isə bu baş vermir və bu hal uşağın immun sisteminin formalaşmasına təsir edə bilər.
Tədqiqatçılar bildirirlər ki, nisbi artıma baxmayaraq, ümumi risk hələ də çox aşağıdır. İsveçdə hər il 50–70 yeni B-KLL halı diaqnoz edilir. Hesablamalara görə, planlı qeysəriyyə əməliyyatları ilə bağlı artan risk, ildə təxminən bir əlavə xəstəlik halına bərabərdir.