Azərbaycanda builki yay turizm mövsümü ərzində onlarla xoşagəlməz hal qeydə alınıb, bəziləri ilə bağlı cinayət işi açılıb.

Azərbaycan Turizm Assosiasiyasının sədri Nahid Bağırovun sözlərinə görə, belə neqativ hallar hotellər, yeni açılmış turizm şirkətləri, özbaşına ekskursiya xidməti göstərən şəxslər, taksi sürücüləri, restoranlar tərəfindən edilib.
N.Bağırov qeyd edib ki, tanınmış hotellər də daxil olmaqla, bir neçə hoteldə turistlərə düzgün xidmətin göstərilməməsi, giriş və çıxış vaxtlarının düzgün müəyyənləşdirilməməsi halları baş verib.
Assosiasiya sədri əlavə edib ki, dünya standartlarına görə, hotellərə giriş gündüz saat 2-də, çıxış gündüz saat 12-də olur:
“Lakin çox hallarda turistlərin gözlədilməsi, hotellərin turist qəbuluna hazır olmadığı müşahidə edilib. Turistlər bəzən axşam saat 7-yədək otaqlarını təhvil ala bilməyiblər. Bu da müəyyən problemlər yaradıb. Bundan başqa, restoranlarda turistlərə, xüsusilə də ərəb turistlərinə bir neçə dəfə olduğundan yüksək qiymətlər təqdim edilib, bəzi turistlər taksi sürücüləri tərəfindən aldadılıb. Özünü bələdçi kimi qələmə verən insanlar Azərbaycanın tarixi, mədəniyyəti haqqında düzgün məlumat çatdırmayaraq turistləri aldadıblar”.
N.Bağırov təəssüflə qeyd edib ki, bir çox dələduzlar özlərini turizm şirkətinin təmsilçisi kimi qələmə verərək həm xarici, həm də yerli vətəndaşları aldadıblar.
N.Bağırov yay turizm mövsümündə belə turizm şirkətlərinin işi ilə bağlı da şikayətlərin olduğunu açıqlayıb:
“Bu mövsümdə onlarla belə hal qeydə alınıb. Bu şikayətlər həm hüquqi, həm də fiziki şəxslərlə bağlı edilib. Xaricə getmək istəyən yerli vətəndaşlar özünü turizm şirkətinin nümayəndələri kimi qələmə verən dələduzlar tərəfindən aldadıldıqlarını deyiblər. Bildiriblər ki, həmin nümayəndələrə xaricə tur təşkil etmək üçün pul ödəyiblər, əvəzində isə onlara saxta sənədlər təqdim edilib. Nəticədə onlar təyyarəsiz, xaricdə hotelsiz qalıblar. Başqa belə bir hal da olub. Azərbaycana gələn xaricilər burada sürücü ilə tanış olublar. O, özünü turizm şirkətinin rəhbəri kimi təqdim edib və əcnəbilərə əlaqə nömrəsini verib. Həmin əcnəbi də öz ölkəsinə qayıtdıqdan sonra o nömrəni qohumlarına verib. Onlar da pulu nəğd şəkildə həmin sürücüyə göndəriblər. Lakin aeroporta gəldikdə görüblər ki, sürücü yoxdur. Sözsüz ki, belə hallarla qarşılaşan turist öz ölkəsinə Azərbaycan haqqında xoşagəlməz fikirlərlə qayıdacaq. Ümid edirəm ki, gələn il bu məsələ həllini tapacaq və bu cür hallar olmayacaq”.
N.Bağırov bildirib ki, saxta turizm saytları açan və həmin sayt vasitəsilə ərəb ölkələrindəki turizm şirkətlərinə parntyorluq təklif edən şəxslər də olub: “Ərəblər həmin saytlara daxil olaraq onunla müqavilə bağlayıb, ödəmələr keçiriblər. Ancaq turistləri göndərdikdə məlum olub ki, həmin “şirkət”lərin internet saytı da, telefonları da bağlıdır”.
N.Bağırov əlavə edib ki, xaricə getmək istəyən və aldadılan yerli vətəndaşlarımızın şikayətləri ilə bağlı da hazırda bir neçə iş hüquq-mühafizə orqanları tərəfindən araşdırılır.gununsesi.info

Manevr.az