Azərbaycan Respublikasının Milli Məclisinin deputatı, Mədəniyyət komitəsinin sədr müavini Günay Əfəndiyeva Türkiyənin İstanbul şəhərinə səfəri çərçivəsində bir sıra görüşlər keçirib.

Manevr.az xəbər vverir ki, Günay Əfəndiyeva İstanbul Şəhər Mədəniyyət və Turizm İdarəsinin rəhbəri Hüseyn Keskin ilə keçirdiyi görüşdə Azərbaycan ilə Türkiyə arasındakı münasibətlərin yüksək səviyyədə davam etdirilməsindən söz açıb. O, qarşılıqlı əməkdaşlığın bütün sahələrdə daha da genişləndirilməsi yönündə Azərbaycan və Türkiyə dövlət başçılarının mühüm səylərini vurğulayıb. Millət vəkili xalqlararası dostluq əlaqələrinin inkişafında mədəniyyət amilinin önəminə diqqət çəkərək, Azərbaycanın işğaldan azad olunmuş Qarabağ torpaqlarının mədəni irsinin bərpası yönündə Azərbaycan dövləti tərəfindən aparılan işləri vurğulayıb.

Millət vəkili Qarabağ bölgəsinin maddi-mənəvi dəyərlərinin beynəlxalq miqyasda çatdırılmasında birgə layihələrin həyata keçirilməsinə diqqət çəkib. İstanbul Şəhər Mədəniyyət və Turizm İdarəsinin rəhbəri Hüseyn Keskin iki ölkə arasında mədəniyyət sahəsində birgə layihələrin həyata keçirilməsi üçün müsbət imkanlar olduğunu bildirib. O, Azərbaycan və Türkiyə arasında qarşılıqlı mədəni mübadilə və daha geniş əməkdaşlıq üçün birgə təşəbbüslərin həyata keçirilməsinin önəmini vurğulayıb. Həmçinin, Günay Əfəndiyeva Türkiyənin Bəyazid Dövlət Kitabxanasının direktoru Ramazan Minder ilə görüşüb. Günay Əfəndiyeva görüş zamanı, kitabxanaların bilik təminatı ilə yanaşı, həm də ölkələr arasındakı elmi-mədəni əlaqələrin inkişafında rol oynamasından söz açıb. O, Azərbaycan və Türkiyə kitabxanaları arasında mütəmadi olaraq qarşılıqlı məlumat mübadiləsinin artırılmasının əhəmiyyətinə toxunub.

Günay Əfəndiyeva ötən ilin sonunda Azərbaycan Milli Kitabxanasında Türkdilli Ölkələrin Milli Kitabxana Direktorları Konfransı Təşkilatının təsis iclasının keçirildiyini xatırladıb. O, Türk dövlətlərinin tarixi yaddaşını özündə əks etdirən milli kitabxanaların birgə fəaliyyətinin həyata keçirilməsini yüksək qiymətləndirib. Millət vəkili Azərbaycan və Türkiyə daxil olmaqla türk ölkələrinin kitabxanalar şəbəkəsinin formalaşdırılmasının Türk Dünyasının inteqrasiyasına töhfə verəcəyinə diqqət çəkib. Bəyazid Dövlət Kitabxanasının müdürü Ramazan Minder rəhbərlik etdiyi kitabxananın fəaliyyəti, eləcə də Türk dünyası ölkələrinin kitabxanaları ilə əməkdaşlığı ilə bağlı təcrübələrini paylaşaraq, bu istiqamətdə aparılan işlər haqqında məlumat verib. Günay Əfəndiyeva görüşlərdə Azərbaycan və Türkiyə arasındakı qardaşlıq bağlarının gücləndirilməsi istiqamətində müxtəlif tipli mədəni tədbirlərin təşkilini dəstəkləməyə hər zaman hazır olduğunu bildirib. Görüşlərdə Türkiyənin tanınmış jurnalisti, araşdırmaçı yazar Şamil Kucur da iştirak edib.

Manevr.az