Deputat qadınları mini “yubka” geyinməyə çağırdı - bunu necə izah etdilər

Rusiyalı siyasətçinin “qızların mini ətək geyinməsi əsl oğlanların xoşuna gəlir” sözlərinə artıq Dövlət Duması cavab verib.
Tarusa şəhər şurasının (Kaluqa vilayəti) Rusiya Liberal-Demokrat Partiyasından olan deputatı Yevgeni Rudenko doğum nisbətini artırmaq üçün rus qadınlarına günəşli günlərdə mini ətək geyinməyi təklif edib. 
Xarici KİV-in xəbərinə görə, o, müraciətini “VKontakte” sosial şəbəkəsində dərc edərək, təşəbbüsünü belə izah edib:
“Tarusanın deputatları Tarusa qadınlarından günəşli günlərdə daha tez-tez mini ətək geyinmələrini xahiş edirlər. Rusiyanın demoqrafik göstəricilərini artırmaq üçün”.
Rudenko izah edib ki, 1970-ci illərdə qadınlar mini ətək geyinəndə “evliliklər güclü olub”.
“Əsl oğlanlar qızların mini ətək geyinməsini xoşlayır (...) Oğlanlar görüşür, sonra evlənir, sonra uşaq sahibi olur. Mən bunu nəzərdə tuturdum", - deputat deyib.
Deputat öz paylaşımını dəridən olan mini ətəkli qızın fotosu ilə müşayiət edib ki, bu da istifadəçilərin qəzəbinə səbəb olub. Bəzi şərhçilər təklif ediblər ki, deputatlar özləri isti mövsümdə şalvar geyinməkdən əl çəksinlər.
Bu bəyanatdan sonra Dövlət Dumasının deputatlarının reaksiyası gəlib. Deputat Nina Ostanina Rudenkonun ifadələrini “dəlinin çılğınlığı” kimi qiymətləndirib. O qeyd edib ki, qanunla rəsmiləşdirilmiş qanunvericilik layihələrini təmsil etməyən, sadəcə bir deputatın fantaziyası olan təşəbbüsləri müzakirə etməməyə üstünlük verir.
Ostanina həmçinin Tarusada deputatların geri çağırılması haqqında qanunun qəbul edilməsini təklif edib ki, seçicilər öz vətəndaşlarının real problemlərini başa düşməyənləri mandatdan məhrum etsinlər.
Bu cür təşəbbüslər, tənqidlərə baxmayaraq, Rusiyada yeni deyil. Daha əvvəl deputat Valeri Seleznev uşaq sahibi olmaq müqabilində qadın məhbusları azad etməklə doğum nisbətinin artırılmasını təklif etmişdi.
Digər deputat Sultan Həmzəyev isə abortdan imtina edən rus qadınlarına uşağın dövlət müəssisələrinə verilməsi şərti ilə maaş verilməsini təklif edib.