“Təhsil Azərbaycanın dövlət siyasətinin və milli inkişaf strategiyasının prioritet istiqamətlərindəndir.”

İlham Əliyev
Azərbaycan Respublikasının Prezidenti

Tanınmış təhsil mütəxəssisi, “İdrak” liseyinin yaradıcısı və təsisçisi, Bakı Dövlət Universitetinin informatika kafedrasının professoru, pedaqoji elmlər doktoru Mönsüm Ədil oğlu Alışovun 3 cilddən ibarət “Təhsil və cəmiyyət” kitabı çoxsaylı oxucuların istifadəsinə verilib. Kitabın elmi redaktorları Pedaqogika üzrə elmlər doktoru, professor, əməkdar müəllim Akif Abbasov və Pedaqogika üzrə elmlər doktoru, professor Fərrux Rüstəmov, rəyçilər Pedaqogika üzrə elmlər doktoru, professor Hümeyir Əhmədov və Pedaqogika üzrə elmlər doktoru, professor Pirəli Əliyevdir.

“Təhsil quruculuğu – hədəflər, nailiyyətlər, problemlər” adlanan I cild cəmiyyətin inkişafında, cəmiyyət üzvlərinin potensial inkişafının fopmalaşmasında təhsilin müstəsna əhəmiyyətindən, yüksək intellektə malik insan kapitalının davamlı inkişaf etdirilməsində təhsilin rolu və əhəmiyyəti yeni yanaşmalarla əsaslandırılır.

İkinci kitab “Təhsil və mədəni-intellektual inkişaf” adlanır. Müəllif dövlətin təhsil siyasətinə münasibətlər kontekstində öz fikir və düşüncələrini oxucularla bölüşür, təhsil sahəsində baş verən yeniliklərə, beynəlxalq inteqrasiyaya, müasir təlim metodları və texnologiyalara, yeni idarəetmə modelinin yaradılmasına əsaslandırılmış mövqe bildirir.

“Təhsil islahatının dinamikası” adlanan 3-cü cild dövrün tələbindən irəli gələn humanistləşmə, demokratikləşmə, şəffaflıq və aşkarlıq prinsiplərinin həyata keçirilməsi, təhsilin forma və məzmunca yeniləşməsi, təhsilin məzmununun cəmiyyətin maraqlarına və təhsil standartlarının tələblərinə uyğunluğundan bəhs edir və bu məqsədlə konkret nümunələr gətirilir.

“3 cildlik” nəfis şəkildə tərtib edilmiş müvafiq aidiyyati illüstrasiyalarla tamamlanmışdır. Tədqiqat xarakterli vəsaitdən müəllimlər, metodist-mentorlar, təhsil təşkilatçıları, habelə pedaqoji sahə ilə maraqlanan digər mütəxəssislər də yararlana bilər. Ümidvaram ki, Mönsüm Alışovun gərgin əməyi və çoxillik zəhməti hesabına ərsəyə gətirilən bu 3 cildlik təhsilimizin inkişafı və tərəqqisi yoluna bir daha yaxından nəzər salmağa imkan verəcək, geniş təhsil ictimaiyyəti tərəfindən rəğbətlə qarşılanacaq.

Onu da qeyd edək ki, bu pedaqogika sahəsi ilə məşğul olan tədqiqatçı alimin ilk vəsaiti deyil və tam əminliklə bildirmək olar ki, yeni kitab onun son yaradıcı işi də olmayacaq. Hal hazırda professor Mönsüm Alışov 100-ə yaxın elmi məqalənin, o cümlədən 2 monoqrafiyanın, 12 dərs vəsaiti, dərslik və metodik vəsaitlərin müəllifi və həmmüəllifidir.

Nadir İsrafilov, təhsil eksperti
Manevr.az