Azərbaycanda nə qədər müəllim var? - STATİSTİKA

Bu gün Beynəlxalq Müəllimlər Günüdür. Bu əlamətdar gün YUNESKO-nun qərarı ilə 1966-cı ildən ümumdünya müəllimlər günü kimi qeyd edilir. Azərbaycanda Beynəlxalq Müəllimlər Günü əlamətdar tarix kimi 1993-cü ildən keçirilir. Ölkəmizdə müəllimlik peşəsi ən çox işçinin çalışdığı ixtisas növündən biridir. Bu peşə sahəsində çalışanların böyük əksəriyyəti dövlətdən maaş alır. 

Manevr.az xəbər verir ki, 2022-ci ilin yanvarın 1-nə olan məlumata əsasən, ölkəmizdə 206 mindən artıq müəllim var.

Müəllimlərin çox hissəsi ümumi təhsil müəssisələrində (orta məktəblər) çalışır. Onların sayı 151 979 nəfərdir.Orta məktəblərdə çalışan müəllimlərin sayı 2000-ci illə müqayisədə 9 513 nəfər, 2020-ci illə müqayisədə isə 1 229 nəfər azalıb. 2000-ci illə müqayisədə müəllimlərin ümumi sayı azalsa da, qadın müəllimlərin sayı artıb. Qeyd edilən tarixdə qadın müəllimlərin sayı 110 757 nəfər idi. Amma hazırda qadın müəllimlərin sayı 124 353 nəfərə yüksəlib. Müqayisə edilən dövrdə qadın müəllimlərin sayı 13 596 nəfər artıb. Bu artımdan sonra qadınların müəllim kontingentindəki say nisbəti 2000-ci ildəki 68,6 faizdən, 2021-ci ilin sonunda 81,8 faizə yüksəlib. Müəllimlərin cəmi 78 faizi ali təhsillidir. 2000-ci ildə bu göstərici 80 faiz olub. 

Ən çox müəllim azərbaycan dili və ədəbiyyatı ixtisası üzrə çalışır. Onların sayı 16 537 nəfərdir. Riyaziyyat ixtisası üzrə 14 920 nəfər, ingilis dili ixtisasi üzrə 14 327 nəfər, tarix ixtisası üzrə 9 109 nəfər, biologiyada 6 249 nəfər, fizikada 6 222 nəfər, coğrafiyada 5 861 nəfər və s. sayda müəllim var. Ən az müəllim gürcü dili və ədəbiyyatı ixtisası üzrədir ki, onların da sayı 98 nəfərdir. 
Orta məktəblərdə çalışan müəllimlərin “ələçatan” minimum maaşı 461 manatdır. Bu məbləğə bir aklad (18 dərs saatı), 3 ilə qədər iş stajı daxildir. Əgər müəllimin sinif rəhbərliyi də varsa, onun maaşı 492 manat olur. Müəllimin stajı 18 il və daha yüksəkdirsə, 588 manat, sinif rəhbərliyi də varsa, 620 manat əmək haqqı alır.  
Orta ümumtəhsil məktəblərindən başqa 17 343 müəllim məktəbəqədər təhsil müəssisələrində (bağçalar), 1 457 müəllim (1 064 nəfəri qadındır) peşə təhsil müəssisələrində, 6 045 müəllim (4 889 nəfəri qadındır) orta ixtisas təhsili müəssisələrində, 14 939 müəllim (8 067 nəfəri qadındır) ali təhsil müəssisələrində, 14 738 müəllim uşaq musiqi, incәsәnәt vә rәssamlıq mәktәblәrində çalışır.sfera.az