Manevr.az xəbər verir ki, bu barədə rusiyalı ekspert Yelena Spetsenko danışıb.
Onun sözlərinə görə, qarpız seçərkən ilk növbədə qabığın bütövlüyünə diqqət yetirmək lazımdır. Çatlar, deşiklər, əziklər və xüsusilə də kəsilmiş qarpızlar bakteriyaların meyvənin içinə daxil olması üçün əlverişli şərait yaradır.
"Belə qarpızları almaq qətiyyən tövsiyə edilmir, hətta satıcı dadına baxmağı təklif etsə belə", – ekspert bildirib.
Mütəxəssis kəsildikdən sonra qarpızın iç hissəsinin vəziyyətinin də vacib göstərici olduğunu vurğulayıb. Onun sözlərinə görə, yumşaq və dağınıq quruluşa malik, qeyri-adi dad və ya qoxu verən qarpızlardan uzaq durmaq lazımdır.
Spetsenko əlavə edib ki, ağ damarlar əvəzinə sarı və ya qəhvəyi damarların görünməsi də təhlükə siqnalı hesab olunur. Bu, yetişdirilmə və ya saxlanma qaydalarının pozulduğunu, eləcə də çürümə prosesinin başladığını göstərə bilər.
Ekspertin fikrincə, qarpız üçün ən böyük təhlükə qabıqdakı zədələrdən daxil olan bakteriyalardır. Birbaşa torpaq üzərində saxlanılan və ya kəsilmiş şəkildə satılan qarpızlar bağırsaq infeksiyalarının yayılması üçün əlverişli mühit yaradır.
Bundan başqa, yol kənarında və sanitar nəzarətin olmadığı qeyri-qanuni satış məntəqələrindən qarpız almaq məsləhət görülmür. Satıcının məhsulun uyğunluq bəyannaməsi, tibbi kitabçası və hüquqi şəxs barədə məlumat təqdim edə bilməməsi də şübhə doğurmalıdır.
