Milli Məclisin Beynəlxalq münasibətlər və parlamentlərarası əlaqələr komitəsinin üzvü, deputat Elman Nəsirovun müsahibəsi:

“Avropa Şurası Parlament Assambleyası prezident İlham Əliyevi hədəfə alıb”

– Bir neçə gün öncə Avropa Şurası Parlament Assambleyasının (AŞPA) Prosedur qaydaları, immunitetlər və institusional məsələlər komitəsi tərəfindən korrupsiyada adı hallanan AŞPA üzvlərinə, o cümlədən Milli Məclisin deputatı Səməd Seyidova qarşı sanksiyaların tətbiq edilməsi ilə bağlı qərar qəbul edilib. Bu qərara münasibətiniz necədir?

– Əvvəla, onu qeyd edim ki, Azərbaycanın AŞPA-dakı nümayəndə heyətinin rəhbəri Səməd Seyidova qarşı tətbiq edilən sanksiyalar qeyri-qanunidir, ədalətsizdir və qərəzli xarakter daşıyır. Təbii ki, burada ən çox sual doğuran məsələ nədən məhz Azərbaycan nümayəndə heyətinin rəhbərinin hədəf seçilməsidir. Hesab edirəm ki, əslində hədəfdə birbaşa Səməd Seyidov deyil. Əsas hədəfdə müstəqil siyasət həyata keçirən Azərbaycanın dövlət rəhbərliyidir. Birbaşa hədəfdə isə Azərbaycan prezidenti cənab İlham Əliyevdir. O səbəbdən ki, Azərbaycan dövlətinin müstəqil siyasətini məhz cənab İlham Əliyev müəyyən edir, o istiqamətləndirir. Azərbaycan dövlətinin xarici siyasəti milli maraqlara söykənir, heç bir beynəlxalq güc mərkəzinin, ayrı-ayrı təşkilatların və beynəlxalq mərkəzlərin diktəsi ilə deyil, məhz Azərbaycan xalqının mənafeyinə uyğun xarici siyasətdir. AŞPA-da isə bu siyasəti Səməd Seyidov həyata keçirir. Azərbaycan prezidenti cənab İlham Əliyevin müəyyən etdiyi xarici siyasət kursunu AŞPA-da icra edən məhz Səməd Seyidovdur. Ona görə də Avropa Şurası Parlament Assambleyası əslində Azərbaycan dövlətini və prezident İlham Əliyevi hədəfə alıb və onun siyasətini həyata keçirən Səməd Seyidov isə birbaşa hədəfə çevrilib.

Bu həmdə onunla bağlıdır ki, Səməd Seyidov Azərbaycan prezidentinin siyasətini çox bacarıqlı və uğurlu şəkildə həyata keçirir. Səməd Seyidov müstəqil fikirli və sözü olan şəxsdir, zaman-zaman avropalıları onların öz dilində açıq şəkildə tənqid edirdi və Azərbaycanın mövqeyini bildirirdi.

Digər tərəfdən isə Səməd Seyidov bu yaxınlarda Türkiyənin Afrin əməliyyatları ilə bağlı da çox açıq şəkildə mövqe ortaya qoyaraq, qardaş ölkəni dəstəklədi. Həmin qüvvələr Türkiyəni də hədəfə alıblar. Avropa İttifaqı 40 ildən çoxdur ki, Türkiyəni bu quruma daxil etmir. AŞPA isə dəfələrlə Türkiyəyə qarşı təzyiqlər tətbiq edib. Belə bir vəziyyətdə görürlər ki, Azərbaycan nümayəndə heyətinin rəhbəri Səməd Seyidov AŞPA kürsüsündən onları açıq şəkildə konkret faktlarla ittiham edir.

Bütün bunlar isə son nəticədə Səməd Seyidovu hədəfə aldı və ona qarşı sanksiyalar tətbiq edildi.

“Kim həyatı ilə risk etmək istəyirsə, Avropanın inkişaf etmiş ölkələrində küçədə gəzsin”

– Siz həm də Azərbaycanla Avropa İttifaqı Parlamentlərarası Əməkdaşlıq Komitəsinin üzvü olan deputatsınız, Avropa ölkələrinə tez-tez səfərlər edirsiniz. Bu qərardan sonra Avropaya səfər edən zaman özünüzü necə hiss edəcəksiniz?

– Bəli, biz Avropada tez-tez oluruq və oradakı reallıqlarla yaxından tanışıq. Misal üçün, bu yaxınlarda Almaniyada baş vermiş bir hadisəni danışım. Almaniyada bir nəfər avtomobili tərk edən zaman içərisindəki kameranı çıxarıb gizlədir. Ondan soruşanda ki, nə üçün avtomobilin qapısını bağlayandan sonra kameranı da gizlədirsiniz? Həmin adam cavabında bildirdi ki, mən maşınımdan ayrılandan sonra avtomobilin şüşəsini sındırıb kameranı apara bilərlər. Yəni, təkcə bu fakt Avropada vəziyyətin nə qədər təhlükəli olduğunu göstərir. Mən özüm də dəfələrlə bunun şahidi olmuşam.

Mən Brüsseldə səfərdə olarkən məsləhət gördülər ki, axşam saatlarında küçədə gəzmək çox təhlükəlidir. Bizə tövsiyə etdilər ki, saat 21:00-dan sonra küçəyə çıxmayaq, əks halda təhlükələrlə üz-üzə qala bilərik.

Biz onlara söylədik ki, Azərbaycanda insanlar səhərədək çox rahat və təhlükəsiz şəraitdə gəzə bilərlər. Heç bir təhlükə yoxdur. Bakı dünyanın ən təhlükəsiz şəhərlərindən biridir. Bunu eşidən avropalılar bizi bəxtəvər insanlar hesab edirdilər. Bizə deyirdilər ki, siz Azərbaycanda yaşadığınız üçün çox bəxtəvərsiniz.

Bütün bunları indi müqayisə edəndə bir daha əmin oluruq ki, Azərbaycan çox inkişaf edib.

Vaxtilə Napoleon da demişdi ki, kimin nədən problemi varsa, ən çox ondan danışır. Doğrudan da bu gün Avropa qədər insan hüquqlarından danışan məkan yoxdur. Ancaq dünyada Avropa qədər də insan hüquqlarının ən çox pozulduğu başqa region mövcud deyil.
Əslində, bu gün çox mürəkkəb qarşudurmaların baş alıb getdiyi dünyada Azərbaycan ən sabit ölkələrdən biridir. Xüsusilə də Azərbaycan müsəlman dünyasında sabitlik adası kimi nüfuza malikdir.

Bu gün Azərbaycana ona görə çox turist axını var ki, ölkəmiz sabit və təhlükəsizdir. Azərbaycan sabit ölkə olduğu üçün bu qədər nüfuzlu və nəhəng beynəlxalq tədbirlərə ev sahibliyi edir.

Bəs Azərbaycan nə üçün sabit ölkədir? Bax bu sualın cavabını axtaranda əmin olursan ki, Azərbaycanda hakimiyyətlə xalqın birliyi var. Xalq öz prezidentini dəstəkləyir, prezident də heç bir beynəlxalq dairənin diktəsilə hərəkət etmir, yalnız öz xalqının mənafelərinə uyğun siyasət həyata keçirir.
Həm də bu sabitlik inzibati yollarla əldə edilməyib. Azərbaycanda sabitlik xalq və hakimiyyətin ortaq birliyindən əmələ gəlib, hakimiyyətin fəaliyyəti xalqı məmnun edir. Son prezident seçkilərində də cənab İlham Əliyevin 86 faizdən çox səs toplayaraq prezident seçilməsi dediyim məsələlərin birbaşa təsdiqidir.

Yəni, o ölkələr bu gün sabit deyil, o ölkələr təhlükəlidir ki, orada xalq hakimiyyəti qəbul etmir və kütləvi etirazlar edir. Bu zaman artıq toqquşmalar baş verir və vətəndaş qarşıdurması yaranır. Biz bu proseslərin hamısını ötən əsrin 90-cı illərində görmüşük.

Çox təəssüf ki, indi Avropanın əksər ölkələri 90-cu illərin Azərbaycanı xatırladır. Mən Avropanın tanınmış şəhərlərinə gedəndə, orada bir daha bunun şahidi oluram. Misal üçün, Strasburqda, Parisdə və digər şəhərlərdə axşam vaxtı küçədə gəzmək təhlükəlidir. Dövlət təhlükəsizlik üçün heç bir təminat vermir. Əgər kimsə həyatı ilə risk etmək istəyirsə, o zaman Avropanın inkişaf etmiş ölkələrində küçədə gəzə bilər. Azərbaycan isə bu mərhələni ötən əsrin 90-cı illərində keçib. Ulu Öndər Heydər Əliyevin Azərbaycana qayıdışından sonra ölkəmizdə 1996-cı ildə sabitlik tam bərqərar olmağa başlayıb.

“Vidadi İsgəndərli Fransaya satılmış insandır”

– Xaricdən Azərbaycan hakimiyyətinə qarşı radikal çağırışlar edən şəxslərə müraciətiniz nə olardı?

– Mən Göyçay rayonundan seçilmiş millət vəkiliyəm. Xaricdə gizlənən həmin anti-milli ünsürlərdən biri olan və söyüşü siyasətə gətirən adamlardan biri Vidadi İsgəndərli də Göyçayda doğulub. Mən onun doğulduğu kənddə olmuşam, həmin kəndin sakinlərilə görüşmüşəm. O insanlar birmənalı şəkildə prezident İlham Əliyevin siyasətini dəstəkləyirlər. Həmin kəndin sakinləri ilə görüşüm zamanı bildirdilər ki, Vidadi İsgəndərlinin Göyçay camaatının adından danışmağa heç bir mənəvi haqqı yoxdur. Kənd camaatı açıq şəkildə deyir ki, Vidadi İsgəndərliyə heç bir sakin dəstək vermir və onu tanımır.
Kənd camaatı mənə bildirdi ki, Vidadi İsgəndərli Fransaya satılmış insandır.

Ümumiyyətlə, Vidadi İsgəndərli, Orduxan Teymurxan və digər bu kimi ünsirlər Azərbaycana qarşı yönəlmiş xarici qüvvələrin əlində alət kimi istifadə olunur. Xarici dairələr onlardan istifadə edirlər.

Eyni zamanda onlara satqın olduqları üçün nifrət edilir. Xarici qüvvələr məqsədlərinə çatandan sonra isə onları istifadə edib tullayacaqlar.

Mən məqaləmdə də ABŞ-ın 40-cı prezidenti Ronald Reyqandan bir misal çəkmişəm. Reyqan deyirdi ki, ən qədim peşənin sakinləri, yəni fahişələr bir halda fiziki deyil, mənəvi mənunluq hissi yaşayırlar. Bu da qarşındakının milli dönük və xəyanətkar olduğunu bilib, ona xidmət etməkdən imtina edərkən yaşanan hisdir. Bu halda onlar öz peşələrinin xəyanətkarlığın fövqündə dayandığından məmnunluq hissi yaşayırlar.

Vidadi İsgəndərli kimi adamlar söyüşü siyasətə gətirən insanlardır. Ona görə də bu cür adamlarla söyüş meydanında deyil, intelektual meydanda danışmaq lazımdır.

Çalışmaq lazımdır ki, bu cür adamları intelektual meydana cəlb edək. Bu adamlar intelektual meydanda dərhal ağ bayraq qaldıracaqlar. Çünki onlar savad, bilik, elm və səviyyə sahibləri deyil. Ancaq etiraf edim ki, onlar söyüş meydanında qalibdirlər. Harada alçaqlıq, təhqir, söyüş varsa, orada onlar bacarıqlıdır. Hesab edirəm ki, onların səviyyəsinə enmək olmaz. Onlarla yalnız intelektual səviyyədə mübarizə aparmaq lazımdır. Mir Şahin də intelektual səviyyəli insan olduğu üçün, həmin ünsürlər bu cür adamları hədəfə alırlar.

Həmin Vidadi İsgəndərli dəfələrlə mənim haqqımda da olmayan şər-böhtan, söyüşlər söyləyib. Amma mən ona hər zaman elmi və mədəni dildə cavab verməyə çalışmışam. O isə bu cür söhbətlərdən qaçıb.(“Ölkə.Az”)

Manevr.az