Tonlarla dizeli mənimsəyən rəislə maşinist həbs edildi

Manevr.az xəbər verir ki, "Azərbaycan Dəmir Yolları" QSC-nin İmişli təminat məntəqəsinin rəisi Eldəniz Sadıqov və teplovoz maşinisti Famil Soltanov külli miqdarda dizel yanacağı və yağı mənimsəməkdə təqsirli biliniblər. Onlar qatarların faktiki hərəkət etmədiyi halda, sənədlərdə əlavə marşrutlar yerinə yetirildiyini göstərərək yanacağı kənar şəxslərə satıblar.

Aparılan araşdırmalar zamanı məlum olub ki, bu qanunsuz əməllər nəticəsində dövlətə ümumilikdə 107 min manat ziyan dəyib. Təqsirləndirilən şəxslər məhkəmə prosesi zamanı əməllərini etiraf ediblər. Xüsusilə rəis E. Sadıqov əlavə olaraq 70 ton dizel yanacağını da mənimsədiyini bildirib. Lənkəran Ağır Cinayətlər Məhkəməsinin hökmü ilə Eldəniz Sadıqov 6 il, Famil Soltanov isə 5 il 6 ay müddətinə azadlıqdan məhrum ediliblər. Dəymiş ziyanın qalan hissəsinin də dövlət büdcəsinə qaytarılması barədə qərar çıxarılıb.

Qeyd edək ki, hər iki şəxs məhkəmə zalındaca həbs olunaraq cəzaçəkmə müəssisəsinə göndərilib. milli.az

Manevr.az