Braziliyada prezident seçkiləri keçirilir

Braziliyada prezident seçkiləri keçirilir. Əsas mübarizə hazırkı Prezident Luis İnasio Lula da Silva ilə keçmiş Prezident Jair Bolsonaronun oğlu, senator Flavio Bolsonaro arasında gedir.
Manevr.az “Associated Press“ə istinadən xəbər verir ki, təxminən 159 milyon seçicinin səsvermə hüququ var. Namizədlərdən heç biri 50 faizdən çox səs toplaya bilməsə, ən çox səs alan iki namizəd oktyabrın 25-də keçiriləcək ikinci tura çıxacaq.
80 yaşlı Lula dördüncü dəfə prezident seçilməyə çalışır. Onun əsas rəqibi, 45 yaşlı Flavio Bolsonaro isə ABŞ Prezidenti Donald Trampın müttəfiqi kimi tanınır. Bolsonaro Vaşinqtonla, xüsusilə nadir minerallar sahəsində daha sərfəli razılaşmalar əldə etməyin tərəfdarı olduğunu bildirib.
Lula isə ABŞ-nin Braziliya siyasətinə mümkün müdaxiləsini tənqid edib və ölkənin suverenliyini seçki kampaniyasının əsas mövzularından birinə çevirib. O, eyni zamanda Çinlə münasibətlərin gücləndirilməsinə üstünlük verib.
Flavio Bolsonaro hakimiyyətə gələcəyi təqdirdə dövlət çevrilişinə cəhddə ittiham olunaraq 27 il həbs cəzası alan atası Jair Bolsonaronun azadlığa buraxılmasına çalışacağını da vəd edib.
Prezident seçkiləri ilə yanaşı, braziliyalılar 27 ştatın qubernatorlarını, 513 federal deputatı və 81 senatordan 54-nü də seçirlər.