Yazarlar bir arada: Mingəçevirdə ədəbi görüş və təəssürat mübadiləsi - FOTO

 Bu gün Azərbaycan Yazıçılar Birliyinin (AYB) Mingəçevir bölməsində şair və yazıçılarla növbəti tədbir keçirilib. Hər ay olduğu kimi, bu gün də qələm sahibləri bir araya gəliblər.

Manevr.az xəbər verir ki, tədbiri açan AYB Mingəçevir bölməsinin sədri, istedadlı şair Elşən Əzim yazarları salamlayaraq, avqustun 3-də Mingəçevir şəhərində və avqustun 11-də Zaqatala şəhərində AYB-nin Zaqatala bölməsinin üzvləri ilə keçirilən görüşlərdən bəhs edib. Bölmə sədri bu cür görüşlərin digər regional bölmələrlə də təşkil olunmasını məqsədəuyğun hesab edib. O vurğulayıb ki, yazarlar arasında belə canlı təmaslar ədəbiyyatımızın inkişafına böyük təkandır. Görüşlər zamanı kitab mübadiləsi aparılıb, yazarlar bir-birinin yaradıcılığı ilə yaxından tanış olublar.

Zaqatala yazarları ilə görüşdə iştirak edən qələm sahiblərindən şair Əhməd Əfsun, nasir Zümrüd Rəhimova, dramaturq Elçin Məhərrəm, şair Rahilə Hüseynqızı, satirik şair Eldəniz Cəfəroğlu, şair-publisist Məmməd Mərzili və başqaları təəssüratlarını bölüşüblər. Həmin səfərdə iştirak edə bilməyən şairlər Namiq Zaman, Ağabala Salahlı, Zakir Ağdamlı və Mehman Rəsulov Zaqatala yazarları ilə görüşə bilmədiklərinə təəssüfləndiklərini bildiriblər.

Daha sonra yazarlar öz yeni yaradıcılıq nümunələrindən şeirlər və parçalar səsləndiriblər. Tədbirin sonunda xatirə şəkilləri çəkdirilib.