Alimlərin on illər əvvəl apardığı hesablamalara görə, dünyanın sonu bu ilin noyabrında baş verə bilər. Bununla belə, sözügedən proqnoz elmi baxımdan bəşəriyyətin məhz həmin tarixdə məhv olacağını təsdiqləmir.
Manevr.az xəbər verir ki, bu barədə UNILAD nəşri yazıb.
Bəşəriyyətin məhv olması təhlükəsi dini mətnlərdən tutmuş müasir elmi fantastikaya qədər müxtəlif mənbələrdə müzakirə olunub. Müasir dövrdə isə iqlim dəyişikliyi, süni intellektin inkişafı və nüvə müharibəsi riski ilə bağlı narahatlıqlar daha da artıb. Bununla yanaşı, alimlər qlobal fəlakət zamanı insanların sağ qalmaq şansının daha yüksək olduğu bölgələri də araşdırırlar.
Dünyanın sonu ilə bağlı noyabr proqnozu
Bu ehtimalın əsası fizik Haynts fon Försterin rəhbərlik etdiyi alimlər qrupunun araşdırmasına dayanır. Tədqiqatçılar bəşəriyyətin mövcud həyat tərzini nə qədər davam etdirə biləcəyini hesablamağa çalışıblar.
Alimlər 1958-ci ildə “Doomsday: Friday, 13 November, A.D. 2026” (“Qiyamət günü: 13 noyabr 2026-cı il, cümə günü”) adlı elmi məqalə dərc ediblər. Araşdırmada İsa peyğəmbərin dövründən 1958-ci ilədək olan demoqrafik məlumatlardan istifadə olunub.
Fon Försterin hesablamalarında, 2026-cı il noyabrın 13-də dünya əhalisinin kritik həddə çatacağı ehtimal olunub. Onun irəli sürdüyü nəzəriyyə əhalinin həddindən artıq artmasının bəşəriyyətin özünü məhv etməsinə gətirib çıxara biləcəyi ehtimalına əsaslanırdı.
Lakin bu hesablamalar dünyanın həmin tarixdə mütləq məhv olacağına dair elmi proqnoz deyil. Onlar müəyyən demoqrafik tendensiyaların davam edəcəyi fərziyyəsinə əsaslanan nəzəri ssenaridir.
Qlobal fəlakət zamanı hansı ölkələr daha təhlükəsiz ola bilər?
Alimlər nüvə müharibəsi, nüvə qışı, aclıq və bioloji təhlükələr kimi qlobal fəlakətlər zamanı hansı ölkələrin daha dayanıqlı ola biləcəyini də araşdırıblar.
Almaniyanın Hagen Universitetindən Florian Ulrix Yeninin rəhbərliyi ilə aparılan və "Global Challenges" jurnalında dərc olunan tədqiqatda müxtəlif ölkələrin ərzaq təhlükəsizliyi, bioloji silah təhlükəsi, vulkanik aktivlik və dövlət idarəçiliyinin keyfiyyəti təhlil edilib.
Araşdırmanın nəticələrinə görə, qlobal fəlakətlər zamanı sivilizasiyanın qorunması baxımından ən əlverişli ölkə Avstraliya hesab olunur.
Bunun əsas səbəbləri ölkənin mümkün nüvə münaqişəsi ocaqlarından uzaqda yerləşməsi, güclü yerli ərzaq istehsalı və inkişaf etmiş enerji infrastrukturu ilə əlaqələndirilir.
Tədqiqatda nisbətən təhlükəsiz bölgələr sırasında Yeni Zelandiya, Argentina və Braziliya da qeyd olunub. Bununla belə, Argentina və Braziliyada sosial bərabərsizliyin yüksək olması böhran şəraitində əhalinin sağ qalmaq imkanlarını çətinləşdirə biləcək amillər kimi göstərilib.
Alimlərin bu araşdırmaları qlobal fəlakətlərin nəticələrini anlamağa və ölkələrin böhranlara hazırlıq səviyyəsini qiymətləndirməyə kömək edir. Bununla belə, heç bir ölkənin bütün mümkün fəlakətlərdən tam təhlükəsiz olacağına zəmanət vermək mümkün deyil.modern.az

Manevr.az