Halifax Təbiət Tarixi Muzeyinin sevimli, 104 yaşlı qofer tısbağası Qas, çərşənbə axşamı sidik kisəsindəki daşla bağlı keçiriləcək əməliyyat ərəfəsində dünyanın müxtəlif yerlərindən gələn dəstək və xoş arzularla ruhlandırılır. Prosedurdan sonra Qas bir neçə həftə ərzində ictimaiyyətə açıq gəzintilərə ara verəcək.
Manevr.az-ın xarici mətbuata istinadən xəbərinə görə, Qasın (Gus) məskunlaşdığı muzeyin müdiri Ceff Qrey bildirdi ki, tısbağanın sidik kisəsindəki daş səbəbindən əməliyyat olunacağı elan edildikdən sonrakı iki həftə ərzində ona yüzlərlə məktub, şəfa diləyi yazılmış açıqca və sənət əsəri göndərilib.
Muzeyin sosial media hesablarına da Kanadanın müxtəlif bölgələrindən və dünyanın hər yerindən minlərlə dəstək mesajı daxil olub.
İnsanların Qasla nəsilləri əhatə edən və hamını birləşdirən bir bağ qurduğunu qeyd edən Qrey bildirib ki, uşaqkən Qasa baş çəkənlər indi öz övladları və nəvələri ilə birlikdə geri qayıdırlar. Bu nostaljini yaşamaq və bölüşmək imkanı insanlara çox təsir edir.
1922-ci ildə yumurtadan çıxdığı ehtimal edilən Qas (Gus), dünyanın məlum olan ən yaşlı qofer tısbağasıdır. O, 1942-ci ildə muzeyin keçmiş direktoru tərəfindən Floridada 5 dollara alındıqdan bəri Təbii Tarix Muzeyinin bir hissəsi olmuşdur. Ziyarətçilər Qasın gündəlik gəzintilərinə qoşula bilərlər: hava isti olanda çəmənlikdə, soyuq və ya yağışlı olanda isə bina daxilində.
Qasın gəzintiləri təkcə yerli sakinlərin deyil, həm də hətta Men ştatı və Almaniya kimi uzaq yerlərdən gələn mübadilə tələbələrinin də diqqətini çəkir. İlk dəfə gələn ziyarətçilər Qasın çiyələk, kahı və banan yeməsini heyranlıqla izləyir və onun keçirəcəyi əməliyyatla bağlı xoş arzularını bildirirlər.
Baytarlıq qrupu ilk dəfə Qasın sidik kisəsi daşını 2009-cu ildə aşkar edib. Son müayinələr daşın böyüdüyünü və ətrafdakı toxumalara basmağa başladığını göstərib.
Muzey meneceri Qrey izah edib ki, 2009-cu ildə daşı çıxarmaq üçün qabıqda qazma işləri aparılmalı olsa da, baytarlıq cərrahiyyəsindəki irəliləyişlər indi Qasın ayağında kiçik bir kəsiklə onun çıxarılmasına imkan verir.
Tısbağa hazırda ağrı əlamətləri göstərməsə də, müdaxilə olmadan daşın digər orqanlara təzyiq göstərərək narahatlıq yarada biləcəyindən əndişə var.
Vəhşi təbiətdə tısbağalar adətən təxminən 60 il yaşayırlar. Təbii yaşayış yerlərindəki ömürləri tez-tez nəqliyyat vasitələrinin toqquşması və insan müdaxiləsi kimi amillər səbəbindən qısalsa da, "əsirlikdə" göstərilən təhlükəsiz mühit, müntəzəm qidalanma və baytarlıq xidməti Qasın ömrünü əhəmiyyətli dərəcədə uzadıb.
Bir əsrdən çox yaşı olan sürünən üçün əməliyyatın müəyyən risklər daşıdığını qəbul edən muzey rəsmiləri digər tısbağalar üzərində aparılan uğurlu sidik kisəsi daşı əməliyyatlarına dair dəlillərin olduğunu qeyd edirlər.
Qasın ümumi sağlamlığının əla olduğunu vurğulayan komanda, bu əməliyyatın onun üçün sağlam və rahat bir gələcəyi təmin etmək üçün ən yaxşı seçim olduğuna inanır.

Sevinc
Manevr.az