Son illərin iqtisadi çətinliklərinə, xüsusən də Ukraynadakı müharibə ilə bağlı problemlərə baxmayaraq, Avropa ölkələri yenidən ən varlı ölkələrin yeni dünya reytinqində birinci yeri tutublar.

Manevr.az qaynarinfo-ya istinadən xəbər verir ki, bu barədə "Euronews" məlumat yayıb.

"HelloSafe"ın təhlilində qeyd olunur ki, dünyanın ən varlı ölkəsi olmaq sadəcə çox məhsul istehsal etməklə məhdudlaşmır. Bu, bu sərvətin orta statistik vətəndaşın gündəlik həyatına nə qədər təsir etməsi ilə ölçülür.

Mütəxəssislərin qiymətləndirməsinə görə 2026-cı ildə dünyanın ən varlı ölkəsi Norveçdir. Skandinaviya dövləti yüksək milli gəliri və balanslaşdırılmış sosial modeli ilə siyahıya liderlik edir.

İrlandiya ikinci yeri tutur. Burada adambaşına real gəlirlər, şişirdilmiş ÜDM göstəricilərinə baxmayaraq, yüksək səviyyədə qalır.

Lüksemburq üçüncü pillədə qərarlaşıb və ilk dəfə bu indeksin tarixində liderliyi itirib. Bununla belə, ölkə hələ də yüksək rifah göstəricilərini qoruyur.

Dördüncü yeri başqa bir Avropa ölkəsi - İsveçrə tutur.

Mütəxəssislər bildirirlər ki, bu ölkələr yüksək iqtisadi göstəricilərlə yanaşı, dünyada ən güclü sosial inkişaf və rifah indikatorlarına da malikdir.

İslandiya siyahıda beşinci yerdədir. Bu nəticə yüksək insan inkişafı göstəriciləri və aşağı nisbi yoxsulluq səviyyəsi ilə izah olunur.

Sinqapur isə yüksək gəlir səviyyəsinə baxmayaraq, əhali arasında qeyri-bərabərliyin yüksək olması səbəbindən daha aşağı mövqedə qərarlaşıb.

ABŞ 17-ci yerdədir. Bu göstərici iqtisadi gücə baxmayaraq, yüksək gəlir bərabərsizliyi və nisbi yoxsulluqla əlaqələndirilir.

Fransa 20-ci pillədə yer alıb və Çexiyadan geri qalır. Çexiya isə Avropada gəlirlərin daha bərabər paylanması və aşağı yoxsulluq səviyyəsi ilə üstünlük qazanır.

Avropanın aşağı sıralarında İtaliya, İspaniya və Estoniya yer alır. Bu ölkələrdə əsas problem daha aşağı gəlir səviyyəsi və bəzi hallarda yüksək nisbi yoxsulluqdur.

Afrikada ən yüksək göstərici Seyşel adalarına məxsusdur. Bu ölkə yüksək adambaşına ÜDM, güclü insan inkişafı və nisbətən aşağı bərabərsizliklə seçilir. Ardınca Mavriki və Əlcəzair gəlir.

Latın Amerikasında lider Uruqvaydır. Ölkə regionda ən yüksək ümumi milli gəlir, ən aşağı yoxsulluq və ən bərabər gəlir bölgüsü ilə seçilir. Sonrakı yerlərdə Çili və Panama qərarlaşıb.

Asiya üzrə birinci yerdə Sinqapur, daha sonra Qətər və Birləşmiş Ərəb Əmirlikləri gəlir.

"HelloSafe”in hazırladığı "rifah indeksi” 50-dən çox ölkəni 100 ballıq sistem üzrə qiymətləndirir. Hesablamalar Beynəlxalq Valyuta Fondu, Dünya Bankı, BMT-nin İnkişaf Proqramı, Eurostat və OECD məlumatlarına əsaslanır.

İndeks gəlirlər, sosial bərabərlik və ümumi rifah göstəricilərini birləşdirərək ölkələrin real iqtisadi vəziyyətini daha dəqiq əks etdirməyi hədəfləyir. Tədqiqat müəlliflərinin fikrincə, adambaşına ÜDM təkbaşına müqayisə üçün kifayət etmir, çünki gəlirlərin əhali arasında bərabər bölündüyünü nəzərdə tutur.