Manevr.az-ın xəbərinə görə, martın 8-də seçilən Xamenei deyib: "Allah bizi qoruyacaq; bölünmə cəhdlərinin qarşısını aldıq. Bütün müsəlman ölkələrinə təşəkkür etmək istəyirəm. ABŞ bazalarını hədəf almağa davam etməliyik. Hörmüz boğazı bağlı qalmalıdır".
Müctəba Xamenei audio mesajında qisas alacağına söz verib.
"Şəhidlərinizin, xüsusən də Minab şəhidlərinin qanının intiqamını almaqdan heç vaxt əl çəkməyəcəyik", - o, əlavə edib.
Mojtaba Xamenei həmçinin bildirib ki, qonşularımızla dostluğa inanırıq, yalnız bazaları hədəf alırıq və lazım gələrsə, bunu davam etdirəcəyik.
"Bölgədəki bütün ABŞ bazaları dərhal bağlanmalıdır; bu bazalara hücum ediləcək. Hörmüz boğazının bağlanması düşmənə təzyiq göstərmək vasitəsi kimi davam edəcək".
Xamenei xalqa müraciət edərək deyib: "Allah bizi qoruyacaq. Liderlər xalqının dəstəyi olmadan uğur qazana bilməzlər; hamımız Allaha sığınmalıyıq. Cəmiyyətimizdəki hər kəs bunu çox aydın başa düşür. Fərqlərimizdən kənara çıxmalıyıq. Bütün fikir ayrılıqlarımızı geridə qoyub İran xalqının gücünü birləşdirməliyik, bu mübarizədə tam sosial və mədəni birliyə nail olmalıyıq.
Biz heç vaxt geri çəkilməyəcəyik. Şəhidlərimizin tökdüyü bütün qanların qisasını alacağıq. Biz təkcə dini liderin deyil, bütün şəhid İran vətəndaşlarımızın qanının qisasını alacağıq. İranlıların qanı qiymətlidir, amma ən əsası qadın və uşaqların qanı qiymətlidir. Buna görə də düşmən Minab məktəbində törətdiyi cinayətlərin bədəlini çox ağır şəkildə ödəyəcək".
