Ermənistan danışıqlar prosesindən yayınmaq üçün yeni hiyləyə əl atır.

Manevr.az publika.az-a istinadən xəbər verir ki, Azərbaycanın işğal olunmuş torpaqlarından Ermənistan tərəfindən yaradılan qondarma “DQR”-in İrəvandakı “nümayəndəsi” Qarnik İsaqulyanın verdiyi açıqlamada işğalçı erməni rejiminin hiylələri aydın şəkildə görünür.

Q.İsaqulyan deyir ki, “əgər Ermənistana təzyiqlər olacaqsa, biz (qondarma “DQR”-i nəzərdə tutur - red) İrəvanın Xankəndini təmsil etmədiyini elan edəcəyik”.

Bu açıqlamaya geniş spektrdən baxdıqda ortada status-kvonun dəyişməsi üçün təzyiq göstərdiyini, İrəvan rejiminin də önləyici addım olaraq, “diplomatik manevr” etdiyini hesab etmək olar. Söhbət hansı təzyiqdən gedir? Mümkündür ki, Ermənistana münaqişənin həlli üçün real danışıqlara başlaması ilə bağlı təzyiqlər var. İndiki məqamda nəzərlər prezidentlərin Rusiyada gözlənilən görüşünə yönəlir. Ehtimal ki, Rusiyada Bakı-Moskva-İrəvan olmaqla keçiriləcək üçtərəfli görüşdə Ermənistanın qarşısına şərtlər qoyulacaq və bu şərtləri İrəvan rejiminin bel bağladığı Kreml də dəstəkləyəcək. Bu kontekstdən Azərbaycan və Rusiya prezidentlərinin iyulun 21-də keçirilən Soçi görüşü yada düşür. Görünür, İrəvan diplomatiyanın pərdələri qapanan səhnəsində baş verənlərdən və gözlənilən təzyiqlərdən məlumatlıdır. Məhz buna görə qondarma “DQR” kartını dövriyyəyə buraxır. Burada bir-biri ilə üzvü şəkildə bağlı olan iki hədəf var.

Birincisi, Ermənistan təzyiqlərin qarşısında duruş gətirmək üçün məsuliyyəti üzərindən atır və “məsələ “DQR”-dən asılıdır” tezisini yaradır.

İkincisi, bununla həm də qondarma “DQR”-i münaqişənin tərəfi olaraq prosesə daxil etməyə cəhd edir.

Ermənistanın bu təhlükəli oyunu faktiki olaraq müharibəyə start vermək deməkdir. Çünki bu manevr avtomatik olaraq onsuz da olmayan danışıqlar prosesini tamamilə sıradan çıxaracaq, vəziyyət belə olanda isə Azərbaycanın ehtiyatda saxladığı hərbi variant qaçılmaz olacaq. Bunu İrəvan da anlayır, lakin iyulun 30-da erməni mediasında yayılan bir xəbər Ermənistanın müharibəyə hazırlaşdığı fikrini ön plana çıxarır.

Qondarma “DQR”-in “müdafiə naziri” Levon Mnasakyan Ermənistanın ictimai televiziyasının efirində elan etdi ki, “Qarabağ ordusu” çox güclüdür, rəqibin bütün hərəkətlərini izləməyə qadirdir və “bizdə alov saçan çox güclü silahlar var”.

İsaqulyanla Mnasakyanın ard-arda verdikləri açıqlamalar təsadüfi ola bilməz. Onların hər ikisini İrəvan rejiminin danışdırdığı və dedikləri sözlərin də işğalçı erməni rejimi tərəfindən hazırlandığı şübhəsizdir.

- Ermənistan gözlənilən təzyiqlərdən yayınmaq üçün diqqəti qondarma “DQR”-in üzərinə yönəldir; bununla həm də danışıqlar prosesinə qondarma “DQR”-i daxil etmək gedişi edir; “DQR”-in “müdafiə qabiliyyətini” gündəmə gətirməklə güc nümayişi göstərir.

Sual yaranır: Ermənistan güc nümayişi üçün niyə “DQR”-i önə sürür, hansı ki, burada erməni ordusunun gücündən danışmaq daha məntiqli olardı.

Cavab aydındır: bu da qondarma “DQR”-i tərəf kimi göstərmək planın tərkib hissəsidir.

Bütün hallarda düşmənin təhlükəli oyun oynadığı ortadadır. Proseslərin inkişafı isə Ermənistanın “məsələni “DQR”-ə dövr etmək”dən ibarət olan hiyləgər planı həyata keçirmək üçün Azərbaycan Ordusunun mövqelərinə təxribat hücumları həyata keçirə biləcəyi ehtimalını gücləndirir.

Manevr.az