Azərbaycanda dövlət qurumlarının saytlarını hədəfə almış govaz.am domeni bloklandı

Xüsusi Rabitə və İnformasiya Təhlükəsizliyi Dövlət Xidməti dövlət qurumlarının saytlarını hədəfə almış govaz.am adlı saxta domeni bloklayıb.
Manevr.az report-a istinadən xəbər verir ki, bunu Dövlət Xidmətinin idarə rəisi Tural Məmmədov təmsil etdiyi qurumun Bakıda keçirdiyi “Dövlət Qurumları IT Rəhbərlərinin V Zirvə Toplantısı”nda bildirib.
Onun sözlərinə görə, həmin saxta domen 1 ay bundan əvvəl aşkarlanıb.
İdarə rəisi həmçinin ötən gün bir sıra media qurumlarının, o cümlədən "Report" İnformasiya Agentliyinin saytına da kiberhücumların edildiyini xatırladıb.
Dövlət Xidmətinin rəis müavini Allahverən İsmayılov isə deyib ki, ölkə rəhbərliyinin apardığı uğurlu siyasət, dövlətimizin günü-gündən möhkəmlənməsi heç də hər kəsin sevincinə səbəb olmur: "Bütün bu uğurları gözü götürməyən qüvvələr var. Biz bunu istər dövlət, istərsə də özəl sahələrə qarşı həyata keçirilən kiberhücum tendensiyalarından da görə bilirik. Elə dünən media qurumlarının saytlarına qarşı həyata keçirilən kiberhücumlar dediklərimin bariz nümunəsi kimi özünü göstərir.
Belə hücumlar həmişə olub və olacaq. Dövlət orqanları istiqamətində olan belə hücumlar demək olar ki, tam şəkildə aradan qaldırılır. Media qurumlarına gəlincə isə hücumlar əsasən resursları kənarda yerləşdirilənlərə olur. Bu məsələlərdə bir az diqqətli olmaq lazımdır. Maarifləndirmə işləri aparılmalı, görüşlər keçirilməli, lazımi tədbirlər görülməlidir ki, belə halların qarşısını tez ala bilərik. Bəzən bizə elə gəlir ki, açıq mənbələrdə elə bir məlumat yoxdur. Ancaq xüsusi xidmət orqanları açıq mənbələrdən apardığı təhlil məlumatları ilə külli miqdarda əməliyyat məlumatları əldə edir. Belə bir sual çıxır ortaya, Əgər açıq mənbələrdə heç nə yoxdursa, niyə ora kiberhücumlar olur? Bu nöqteyi-nəzərdən indiki zamanda hər şeyə sadə baxmamalıyıq. Hər şeyə təhlükəsizlik prizmasından baxmaq lazımdır. Hər kəs fəaliyyət göstərdiyi sahədə təhlükəsizliyni təmin edilməsi imkanlarını tam tətbiq etməlidir".