Bu gün martın 31-dir... Düz 107 il əvvəl bu günlərdə əksəriyyəti uşaq və qadın olan 50 min azərbaycanlı erməni şovinistləri tərəfindən vəhşicəsinə qətlə yetirildi. Bununla yanaşı Bakıda, Şamaxıda, Qubada, Şuşada və digər qəza, şəhərlərimizdə yaşayış binaları, tarixi memarlıq abidələri, mətbəələr, məscidlər, məktəblər yerlə-yeksan edildi.

O günlər Azərbaycanda ölənlər təkcə qadınlar, uşaqlar, körpələr və günahsız dinc sakinlər deyil, eyni zamanda insanlıq idi, bəşəriyyət idi, bəşəriyyətə xidmət etməsi gözlənilən, ancaq başları dünyanı bölüşdürməyə qarışan böyük dövlətlər idi...
Düz 5 ay (soyqırım Qafqaz İslam Ordusu Azərbaycanı, Bakını sentyabrda xilas edənə qədər davam etmişdir) dünyanın gözü qarşısında qətlə yetirilənlər əslində həm də bütöv bəşəriyyət idi, bütün bəşəriyyətin gələcəyə olan ümidləri idi.
Bu gün biz qatil bolşevik-daşnak alyansının 1918-ci ilin mart-sentyabr aylarında qətlə yetirdiyi on minlərlə soydaşımızı kədərlə xatırlayırıq, 31 Mart – Azərbaycanlıların Soyqırımı Gününü yad edirik.

Təəssüflər ki, ermənilərin uzun illər davam edən soyqırım, işğal və istila siyasətinə son qoyulmadı. Onlar 1948-1953-cü illərdə azərbaycanlıları tarixi torpaqlarından deportasiya etdilər, 1992-ci ildə isə Xocalı soyqırımını törətdilər.
Azərbaycanlıların soyqırımına ilk dəfə siyasi qiymətin verilməsi Ulu Öndər Heydər Əliyevin adı ilə bağlıdır. 1998-ci il martın 26-da Ümummilli Lider Heydər Əliyevin imzaladığı “Azərbaycanlıların soyqırımı haqqında” Fərmanda həmin dəhşətli hadisələrə adekvat siyasi qiymət verildi və 31 mart Azərbaycanlıların Soyqırımı Günü elan edildi. Erməni millətçilərinin cinayətkar əməllərinə verilən dolğun və hərtərəfli hüquqi-siyasi qiymət olan bu mühüm sənəddə ilk dəfə olaraq azərbaycanlılara qarşı törədilmiş kütləvi qırğınların - soyqırımlarının rəsmən adı çəkildi, Cənubi Qafqazda xalqımıza qarşı aparılmış etnik düşmənçilik siyasətinin kökləri açıqlandı.

Ermənistan uzun illər həyata keçirdiyi soyqırımı, nifrət, etnik ayrı-seçkilik siyasətinin bədəlini gec-tez ödəyəcək.
İnanıram ki, Hitleri bəşəriyyətin ortaq ittifaqı dayandırdığı kimi, erməni faşizmi və onun qətl şəbəkəsini də eyni şəkildə dayandıracaqlar.
Əks halda, 31 Mart soyqırımı, Xocalı soyqırımına görə məsuliyyətin olmadığı bir dünyada sülh olmayacaq!
Şübhəm yoxdur ki, Azərbaycan olaraq nəyin bahasına olursa olsun erməni faşizminə qarşı durmağa və dünyanı bu şərəfli mövqeyə çağırmağa davam edəcəyik. Çünki, ermənilərin törətdikləri soyqırım azərbaycanlıları öldürür. Ermənilərin törətdiyi soyqırım insanlığı, bəşəriyyəti öldürür. Erməni faşizmi faşizmin ən yüksək nöqtəsidir.
Dünyada nasist, faşist emblemi qadağan olunduğundan, həmin nasizm, faşizm tərəfdarları “44” rəqəmini faşizm simvolunu xatırladan forma kimi yayğın istifadə edirlər. Maraqlısı odur ki, biz Qarabağ və Şərqi Zəngəzurdan erməni faşizminin kökünü elə 44 gündə kəsdik.
Ümid edir və inanırıq ki, soyqırım cinayəti törədənlər layiqli cəzalarını alacaq və regionumuza layiqli sülh gələcəkdir. Ancaq gələcəkdə nəyin necə olmasından asılı olmayaraq biz ermənilərin və onların havadarlarının törədikləri soyqırımları unutmayacağıq. Çünki, unudulan soyqırım təkrarlanar.

Tural Akif oğlu Vəlizadə
MMU nəzdində Bakı Hərbi Kolleci və
Bakı Qızlar Universitetinin müəllimi
Bakı Dövlət Universitetinin doktorantı