Kanadada Çərkəz Məcidin xatirə gecəsi keçirildi

Kanadanın Toronto şəhərində mərhum şair, yazıçı və ictimai xadim Çərkəz Məcidin xatirə gecəsi keçirilib.

Manevr.az xəbər verir ki, Azərbaycanlı Qadınlara Dəstək Mərkəzinin təşkilatçılığı ilə keçirilən tədbirə mərkəzin idarə heyətinin üzvü Yeganə Cəfərova aparıcılıq edib. Tədbirə Çərkəz Məcidin ailə üzvləri, doktor Elsəvər Səmədov, dilçi alim Solmaz Kazımova, ədəbiyyatşünas Qardaşxan Əzizov, araşdırmaçı alim Cəlal Ruşən və başqa qonaqlar qatılıb. İştirakçılar Çərkəz Məcidin həyat və yaradıcılığından danışıblar, öz xatirələrini bölüşüblər. Tədbirdə Çərkəz Məcidin şeirlərinə həsr olunmuş mahnılar səsləndirilib.

Qeyd edək ki, mərhum şair Çərkəz Məcid 1937-ci ilin may ayında Cəbrayıl rayonunun Böyük Mərcanlı kəndində ruhani ailəsində anadan olub. Azərbaycan Dövlət Pedaqoji İnstitutunun filologiya fakültəsini bitirib. Əmək fəaliyyətinə Böyük Mərcanlı kəndində müəllim kimi başlayıb və ömrünün sonuna qədər müəllim işləyib. Ömrü boyu haqsızlıq və ədalətsizlik ilə mübarizə aparan şairin yaradıcılığında vətənpərvərlik, milli ruh, təbiət və haqq-ədalət əsas yer tutur. Çərkəz Məcid 1989-cu ilin 9 yanvarında dünyasını dəyişib. Ölümündən sonra şair Elşad Barat onun həyat və yaradıcılığı haqqında iki cilddə "İkinci ömür" adlı kitab yazıb.