Ukrayna Silahlı Qüvvələrinin məlumatına görə, Rusiya ordusu son döyüşlərdə 1010 hərbçisini itirib və təxminən 600 hərbi texnikası sıradan çıxarılıb. Rusiya hərbi hava qüvvələrinə məxsus bir neçə təyyarə və helikopterin də məhv edildiyi bildirilir.

Manevr.az xəbər verir ki, Rusiya tərəfi gecə saatlarında Çerniqov şəhərinə pilotsuz uçuş aparatları ilə hücum təşkil edib. Ərazidə azı iki partlayış qeydə alınıb, lakin ölən və yaralananlarla bağlı məlumat verilməyib.

Rusiya Müdafiə Nazirliyi açıqlayıb ki, hava hücumundan müdafiə sistemləri Ukraynaya aid 69 dronu zərərsizləşdirib. Bu PUA-lar Belqorod, Moskva, Krım və digər bölgələrin səmasında vurulub. Hər hansı dağıntı və ya tələfat barədə məlumat yoxdur.

Gecə boyunca Krasnodar və Rostovda raket təhlükəsi ilə bağlı xəbərdarlıqlar edilib. Səhər saatlarında isə Kazan şəhərində PUA təhlükəsi ilə əlaqədar həyəcan siqnalı verilib. Sakinlərə təhlükəsizlik tədbirlərinə əməl etmələri tövsiyə olunub.