Pakistan ABŞ-ı hərbi cinayətdə ittiham etdi: “İrana qarşı aqressiya..."

ABŞ-ın İrana qarşı həyata keçirdiyi genişmiqyaslı hərbi hücumlar beynəlxalq aləmdə ciddi narahatlıqla qarşılanmaqdadır.
Manevr.az xəbər verir ki, ciddi reaksiya verən ilk ölkələrdən biri isə Pakistan olub. Pakistan parlamentinin Müdafiə Komitəsinin sədri çıxış edərək, Birləşmiş Ştatların bu addımını açıq şəkildə “hərbi cinayət” adlandırıb.
Komitə rəhbərinin sözlərinə görə, ABŞ-ın İrana qarşı tətbiq etdiyi güc beynəlxalq hüququn və BMT Nizamnaməsinin əsas prinsiplərinin kobud şəkildə pozulması deməkdir:
“Bu cür birbaşa hərbi müdaxilə beynəlxalq hüquq normalarını ayaq altına atmaqla yanaşı, bölgədə yeni və daha təhlükəli müharibələrin başlanğıc nöqtəsinə çevrilə bilər,” – deyə o vurğulayıb.
Pakistan rəsmisi əlavə edib ki, ABŞ-ın İranın nüvə obyektlərinə qarşı həyata keçirdiyi hücum bir ölkənin suverenliyinə qarşı yönəlmiş aktdır və bunun nəticələrinin yalnız region üçün deyil, qlobal sülh və təhlükəsizlik üçün də ağır ola biləcəyini qeyd edib.
“Biz ABŞ-ın bu hərəkətini təkcə siyasi məsuliyyətsizlik kimi deyil, həm də bəşəriyyətə qarşı yönəlmiş hərbi cinayət kimi dəyərləndiririk. Belə bir addım regionda milyonlarla insanın həyatını təhlükə altına qoyur,” – deyə komitə rəhbəri bəyan edib.musavat.com