Nuhun gəmisi Türkiyədədir? - Həmin yer ilk dəfə axtarılacaq - FOTO

Min illərdir dini mətnlərdə adı çəkilən Nuhun gəmisinin qalıqları olduğu ehtimal edilən yerdə ilk dəfə qazıntı işləri aparılacaq.
Manevr.az xəbər verir ki, Türkiyənin şərqində Ağrı dağının cənubunda yerləşən Durupınar Formasiyası illərlə davam edən araşdırmalardan sonra bu böyük arxeoloji tapıntı üçün mərkəzə çevrilib.
Qazıntı işlərinə başlamazdan əvvəl "Nuh's Ark Scans" şirkətinin mütəxəssisləri tərəfindən ərazidə radar skanları aparılır və "yeraltını görmək" texnologiyasından istifadə olunur.
Bu formasiya təxminən 160 metr uzunluğundadır və gəmi silueti ilə seçilir. Yerli süxurların limonit adlı dəmir filizindən ibarət olduğu bildirilib. 

Tədqiqatçılar qazıntı prosesinə başlamazdan əvvəl kifayət qədər sübut toplamaq və mühafizə planı yaratmaq niyyətindədirlər. Əgər əldə edilən dəlillər gəminin süni obyekt olduğunu sübut edərsə, arxeoloji qazıntılara start veriləcək.
Radar üsulları sayəsində daxili bölmələrə bənzəyən düzbucaqlı formalar aşkarlanıb. Torpaq analizləri gil, dəniz çöküntüləri, hətta mollyuskaların qalıqları kimi izləri ortaya çıxarıb. Bu qalıqların 3500-5000 il əvvəl mövcud olduğu müəyyən edilib ki, bu da Bibliyadakı daşqın dövrü ilə uyğunluq təşkil edir.
Qeyd edək ki, Durupınar 1948-ci ildə güclü yağışlar və zəlzələ nəticəsində palçıq təbəqələrinin hərəkəti ilə formalaşıb və bir çoban tərəfindən kəşf edilib. O vaxtdan bəri bölgə xüsusilə möminlər və tarix tədqiqatçılarının maraq dairəsindədir.milli.az