Manevr.az xəbər verir ki, Yardımlı rayonunda oğulun atasını öldürməsi məsələsiylə bağlı dəhşətli faktlar ortaya çıxıb.

Kənd sakinlərindən AzNews.az-a verilən məlumata görə, atasıyla həmişə mehriban münasibətdə olan oğulun birdən-birə düşmənə çevrilməsi, nəticədə də onu öldürməsi dini inancları arasındakı ziddiyyətlə bağlı olub. Belə ki, Quba Dövlət İqtisad Kollecinin Yol hərəkətinin təşkili fakültəsinin 3-cü kurs tələbəsi olan Qaçay Nadir oğlu Şahverənov vəhhabilərə qoşulubmuş. O, Qubada təhsil alsa da, tez-tez Bakının vəhhabilərin daha çox məskunlaşdığı “Razin” qəsəbəsinə gedirmiş, orada təşkil olunan məclislərə qatılırmış. Kənd sakinləri deyir ki, qatı şiə olan ailədə Qaçayın dini baxışları ciddi problemə səbəb olub. Onun saqqal saxlaması, şalvarlarının ətəyini qısa kəsdirməsi isə bu problemi bir qədər də dərinləşdirib.

Məzuniyyətə kəndə gələn tələbə ilə atasının bir neçə dəfə ciddi mübahisələrinin olduğu da bildirilir. Hətta iş o yerə çatıb ki, atası onu saqqalını qırxmadığı təqdirdə öldürəcəyi ilə hədələyib. Bundan sonra - hadisə baş verməzdən bir neçə gün əvvəl Qaçay evlərindən çıxıb yaxın qohumlarıgildə qalmağa başlayıb.

Məlumatlı şəxslər deyib ki, onun atasını öldürməsi qərarına gəlməsi şəxsi fikri olmayıb: “Öz imamı ilə danışıb, atasının ona dediklərini, vəhhabiliyə qarşı çox radikal davrandığını bildirib. Bundan sonra o əmr edib ki, atasını öldürsün”.

İddia olunur ki, belə bir əmri alandan sonra Qaçay hazırlıqlara başlayıb, tüfəng əldə edib və onu həyətlərindəki tövlədə gizlədib. Həmin gün qətlə yetirilən Nadir Şahverənov evdə olmayıb, səhər tezdən rayon mərkəzinə gedib. Buna görə də oğul atasını axşama kimi gözləməli olub. Axşam üstü, təxminən 17 rədələrində evinə qayıdan Nadir həyətə daxil olanda arxadan, kürəyindən oğlu tərəfindən vurulub. Oğul hadisəni törədəndən sonra özü polisə zəng edərək təslim olub.

Polisdən AzNews.az-a verilən məlumata görə, o öz izahatında atasını öldürdüyünə görə heç bir peşmanlıq keçirmədiyini bildirib.

Yardımlı rayon prokurorluğundan isə Lent.az-a bildirilib ki, Q.Şahverənov ilkin ifadəsində törətdiyi əməldən peşman olmadığını bildirib. O deyib ki, Bakıdan hər dəfə kəndlərinə qayıdanda atasının anasını incitdiyini görüb. Atasını da məhz bu səbəbdən – anasını döydüyü, incitdiyi üçün öldürüb.

Lakin onun vəhhabi olması və atasını “imamının” əmriylə öldürməsi xəbərini rəsmi qurumlar təkzib edib.

Belə bir ərəfədə AzNews.az atasını güllələyən Qaçay Şahverənovun fotosunu əldə edib.

Fotodan görünür ki, Qaçay saqqal saxlayırmış. Lakin bu saqqalın vəhhabiliyə nə dərəcədə aidiyyətinin olması barədə birmənalı fikir söyləmək olmaz.

Qeyd edək ki, tələbə oğlanın vəhhabi olması iddiası ilə kənd sakinləri, qətlə yetirilən şəxsin yaxınları çıxış ediblər. Bildiriblər ki, Qaçayın saqqal saxlaması, vəhhabilər kimi qısa ətəkli şalvarlar geyinməsi atası ilə arasında ciddi problemlər yaradıb. Hətta iş o yerə çatıb ki, atası onu saqqalını qırxmadığı təqdirdə öldürəcəyi ilə hədələyib. Bundan sonra - hadisə baş verməzdən bir neçə gün əvvəl Qaçay evlərindən çıxıb yaxın qohumlarıgildə qalmağa başlayıb. Qohumlarıgildə qalarkən isə əmisinin təkidi ilə saqqalını qırxıb.

Digər məlumata görə isə, Quba Dövlət İqtisad Kollecində təhsil alan Qaçay atasını anasını incitdiyinə görə öldürüb. Prokurorluqdan verilən məlumata görə, öldürülən şəxs həyat yoldaşını tez-tez döyür, ona qarşı nalayiq ifadələr işlədirmiş. Anasının təzyiqlərə və təhqirlərə məruz qalmasına dözməyən oğul atasının canına qıyıb.

Faktla bağlı Yardımlı Rayon Prokurorluğunda araşdırma aparılır.