Hüseyn Abdullayev növbəti dəfə hakim qarşısına çıxarılıb. Məhkəmə prosesində yeni və maraqlı məlumatlar üzə çıxıb.

Bakı Hərbi Məhkəməsində sabiq deputat Hüseyn Abdullayev, onun anası Zeynəb Abdullayeva, Həbib İbrahimov, Xalid Əliyev, Namiq Babayev, İntiqam Süleymanov, Pərviz Kazımov, Zaur Quliyev və Nazim Əliyevin cinayət işi üzrə məhkəmə iclası keçirilib. Məhkəməyə hakim Həbib Həsənov sədrlik edib.

Manevr.az-ın məlumatına görə, "Yeni Müsavat" qəzetinin məhkəmə prosesində iştirak edən müxbiri xəbər verir ki, prosesdə Hüseyn Abdullayev sərbəst ifadə vermək istəyib.

O, əvvəlcə məhkəmədən xahiş edib ki, deyəcəyi sözlər protokola yazılsın və sözü kəsilməsin.

Abdullayev ifadəsinə başlayan zaman elan olunmuş ittihamlarla özünü qətiyyən təqsirli bilmədiyini deyib:

"2018-ci ci il aprelin 21-də Türkiyədə qanunsuz olaraq saxlanıldım. Sonra da Azərbaycan hüquq-mühafizə orqanlarına təhvil verildim. Barəmdə "İnterpol" xətti ilə belə axtarış verilməmişdi. Bu addımla BMT-nin Cenevre konvensiyasının şərtləri belə pozulub.

Əvvəla məhkəmədən, cənab prokurordan xahiş edirəm ki, mənə qarşı irəli sürülən ittihamı izah edin. Deyin görək metal, pul məsələləri ilə bağlı ittihamlar hardan gəlir, səbəb nədir? Yazılıb ki, guya 2000-2018-ci illər ərzində metal biznesi ilə məşğul olmuşam, qazanc əldə edib vergidən yayınmışam. Halbuki bu əsassızdır. Bircə nəfər də deyə bilməz ki, mən ondan metal alım və ya metal satım.

Mən vaxtilə əlvan və qara metal biznesi ilə məşğul olmuşam. Bu isə 1991-1998-ci illərə təsadüf edir. O zaman Ukraynada metal biznesi ilə məşğul olmuşam, oradan əlvan və qara metalı başqa ölkələrə ixrac etmişəm. Ən çox mal ixrac edən biznesmenlərdən biri idim. Həmin ərəfədə 1991-ci ildə Culfa ilə İran sərhədində geniş ticarət əlaqələri qurdum və biznesə orada da davam elədim.

1992-ci ildən doğulduğum Naxçıvan Muxtar Respublikası ağır blokadada olanda İnkişaf və Müdafiə Fondunun əsas sponsorlarından biri olmuşam. O zaman etdiyim yardımlarla əsgərləri geyim və ərzaqla təmin etmişəm. Bununla da hər zaman fəxr etmişəm. Diqqətinizə çatdırım ki, ölkənin rəsmi olaraq ilk milyonçularından biri olmuşam".

Hüseyn Abdullayev daha sonra hədə-qorxu ilə kimdənsə pul tələb etmək ittihamına da münasibət bildirib:

"Yuxarıda necə bir insan olduğumu, hansı imkanlara sahib olduğunu qeyd etdim. Sizcə belə bir adam kimdənsə 3 min manatı hədə-qorxu ilə tələb edər, belə utancverici iş görər? Niyə mən o günə qalmışam? Bu biabırçılıqdır. Mənim anamın və atamın adına olan mülklərin qanunsuz yollarla əldə edilmiş pullarla alındığı yazılıb. Axı bu qədər ədalətsizlik, haqsızlıq, belə bir biabırçılıq olmaz".

İfadəsinin davamında Hüseyn Abdullayev xaricdə özünün və anasının adına olan bank hesablarından da danışıb.

Qeyd edib ki, İsveçrə və Almaniyada özünün və anasının adına hesablar var: "Bu pullar mənim biznesimdən halal, qanuni yolla qazanılıb. Bu, mənim alın tərimdir. Həmişə də vergini ödəmişəm.

Mənə verilən ilk ittiham Nəriman Nərimanovun heykəlinin yanındakı başıbəlalı binaya görə verilib. 2005-ci ildə deputat seçildiyim üçün qanun mənə bizneslə məşğul olmağa icazə vermirdi. Buna görə də biznesimi anamın və atamın adına keçirtdim. Onlar bu işi davam etdirdilər. Həmin ərəfədə isə cəmi bir bina, diqqətlə dinləyin, cəmi bir bina tikdilər. O binanın da bütün ödənişləri edilib, vergilər ödənilib.

Anam həmin tikinti ilə bağlı 1.8 milyon manat vergi ödəyib. Amma 2013-cü ildə mənə buna görə cinayət işi başlanıldı. Həmin vergini ödəmədiyim deyildi. Ödənilən məbləği görməzdən gəlib cinayət işinə xitam vermədilər. Bütün bunlardan sonra mən məcbur qalıb doğma yurdumdan, canım qədər sevdiyim Azərbaycanımdan didərgin düşdüm".

Hüseyn Abdullayev ifadəsinin bu hissəsində kövrəlib və göz yaşlarını saxlaya bilməyib.

İfadəsinə davam edən Hüseyn Abdullayev 2013-cü ildə Almaniyadan siyasi sığınacaq almasından danışıb: "Qanunsuz təzyiqlərdən sonra sığınacaq istədim. Almaniya hökuməti də sağ olsun ki, ədalətli araşdırma aparıb razılıq verdi".

Hüseyn Abdullayev ifadəsinin yekunlaşdıran zaman məhkəməyə və prosesdə iştirak edən şəxslərə müraciət edib.

"Burdakı adamların çoxu məni ya deputat, ya da bəzi mahnıların bəstəkarı kimi tanıyır. Bir məsələni deyim ki, vaxtilə dəstək verdiyim, kömək etdiyim insanlar bunları unutdular. Bilirəm, amma eybi yoxdur. Buna görə təəssüflənmirəm də.

Hamının nəzərinə çatdırmaq istəyirəm ki, mən bütün gəncliyimi dövlətçiliyimizə qurban vermişəm. Onun möhkəmlənməsinə, qorunub saxlanmasına xidmət etmişəm. Ölkədə kriminal dəstələrin baş qaldırdığı zamanda özümün, ailəmin həyatını təhlükəyə ataraq fəaliyyət göstərmişəm. Heç vaxt buna görə peşman olmamışam. Hamı bilsin ki, bircə dəfə də olsun dövlətimizə xəyanət etməmişəm. Dövlətçiliyin əleyhinə bir addım belə atmamışam. Mənə olan təzyiqlərin nəticəsi olaraq atamı itirdim, əmlaklarım zəbt edildi. Bütün bunları Allah götürməz. Mən məhkəmədən razıyam. Məhkəmənin ədalətinə inanıram".

Xatırladaq ki, ötən prosesdə Dövlət Sərhəd Xidmətinin sabiq əməkdaşları, iş üzrə təqsirləndirilən Həbib İbrahimov, Zaur Quliyev və Pərviz Kazımovun vəkilləri çıxış edib. Vəkillər vəsatət qaldıraraq, onların barəsində seçilmiş həbs qətimkan tədbirinin ev dustaqlığı ilə əvəz edilməsini istəyib. Həmin şəxslər H.Abdullayevin anasına sərhəddi keçərkən kömək etməkdə ittiham edilirlər. Vəsatətlər təmin olunub və hər üç şəxs ev dustaqlığına buraxılıb.

Qeyd edək ki, Azərbaycan Respublikasının Vergilər, Daxili İşlər nazirlikləri və Baş Prokurorluğun mətbuat xidmətlərinin birgə yaydığı məlumata əsasən, Vergilər Nazirliyi tərəfindən aparılmış səyyar vergi yoxlaması nəticəsində “Araz İNC” MMC-də 1 milyon 436 min manat məbləğində vəsaitin dövlət büdcəsinə ödəməməsi faktı üzrə 7 iyun 2013-cü il tarixdə Cinayət Məcəlləsinin 213.2.2-ci (vergi ödəməkdən yayınma) maddəsi ilə cinayət işi başlanıb.

Onun barəsində məhkəmə qərarı əsasında həbs qətimkan tədbiri seçilməklə “İnterpol” xətti ilə beynəlxalq axtarış elan olunub.

3 oktyabr 2016-cı il tarixdə H.Abdullayevə ümumilikdə 1 milyon 810 min manat məbləğində vergiləri dövlət büdcəsinə ödəməkdən yayındırması və xüsusi razılıq (lisenziya) tələb olunduğu halda belə razılıq almadan tikinti-quraşdırma işlərini həyata keçirərək 966 min manat məbləğində gəlir əldə etməsinə əsaslı şübhələr müəyyən edildiyindən Cinayət Məcəlləsinin 192.2.2 (qanunsuz sahibkarlıq) və 213.2.2-ci maddələri ilə yenidən ittiham elan edilməsi barədə qərar çıxarılıb.

Təqsirləndirilən şəxs H.Abdullayev Türkiyə Respublikası ərazisində tutularaq 22 aprel 2018-ci il tarixdə Azərbaycan Respublikasının hüquq mühafizə orqanlarına təhvil verilib.

Bundan başqa ayrı-ayrı şəxslərin Baş Mütəşəkkil Cinayətkarlıqla Mübarizə İdarəsinə daxil olmuş müraciətləri əsasında 14 fevral 2018-ci il tarixdə başlanmış cinayət işi üzrə H.Abdullayevin 2006-cı ildən 2018-ci ilədək olan müddət ərzində faktiki nəzarət etdiyi “Araz-İnşaat” ASC-də onun tapşırığına əsasən müəssisənin idarə olunmasını həyata keçirən Babayev Namiq İsmixan oğlu və qeyriləri ilə qabaqcadan əlbir olan bir qrup şəxs halında cəmiyyətə məxsus obyektləri müxtəlif vaxtlarda ayrı-ayrı şirkətlərə icarəyə verərək ümumilikdə 1 milyon 374 min manat məbləğində gəlirlərin cəmiyyətin kommunal xidmət və sair xərclərinin ödənilməsinə sərf olunmasına dair digər səhmdarlara yalan məlumat verməklə 13 min 373 manat məbləğində dividentləri vahid qəsdlə ələ keçirib zərərçəkmiş şəxslərə xeyli miqdarda maddi ziyan vurmaqla dələduzluq etməsinə şübhələr müəyyən edilib. Eləcə də H.Abdullayevin dəfələrlə N.Babayev vasitəsilə, daha sonra isə Almaniyadan istifadəsində olan telefondan “Autist Uşaqların Reablitasiyasına Kömək” İctimai Birliyinin sədri Elnur Məmmədova zəng edərək onun və ailə üzvlərinin ünvanına nəlayiq ifadələr işlədib tələblərinə əməl etməyəcəyi halda onları məhv edəcəyi ilə hədələyərək icarə müqaviləsi şərtlərinə görə hər ay ödəməli olduğu 3 min manat icarə haqqı əvəzinə onun nümayəndələrinə 6 min manat pul ödəməsini hədə-qorxu ilə tələb etməsinə əsaslı şübhələr müəyyən edildiyindən o, Cinayət Məcəlləsinin 178.2.1 (dələduzluq), 178.2.2, 178.2.4, 182.2.1 (hədə-qorxu ilə tələb etmə), 182.2.2 və 182.2.4-cü maddələri ilə təqsirləndirilən şəxs qismində cəlb edilməklə həmin maddələrdə nəzərdə tutulmuş ittiham elan edilib.

Manevr.az