Mövlam Şıxəliyev özünü və əmlaklarını xilas edə bilmədi

Ləğv edilmiş Milli Təhlükəsizlik Nazirliyinin (MTN) İstintaq Baş İdarəsinin keçmiş rəisi Mövlam Şıxəliyev özünü və əmlakını xilas edə bilməyib. 
Manevr.az qaynarinfo-ya istinadən xəbər verir ki, keçmiş rəisin Ali Məhkəməyə kassasiya şikayəti təmin olunmayıb. Hakim Nazim Mövsümovun sədrliyi keçirilən prosesdə Mövlam Şıxəliyev barəsində çıxarılmış hökm qüvvədə saxlanılıb.

Mövlam Şıxəliyev və digərləri kassasiya şikayətlərində onlara bəraət verilməsini və müsadirə olunmuş əmlkalarının geri qaytarılmasını istəyirdi. 
Xüsusilə, Mövlam Şıxəliyev ən pis halda əmlakları barədə qərarın ləğvinə çalışırdı. Hətta onun ailə üzvləri də bununla bağlı ayrıca iddia qaldırmışdı. Bu prosesin nəticəsi hələ ki, bəlli deyil. 
Mövlam Şıxəliyev, İstintaq Baş İdarəsinin keçmiş şöbə rəisi Vüsal Ələkbərov, İbtidai istintaq idarəsinin sabiq rəis müavini Yasin Məmmədov, şöbə rəisinin sabiq müavini Sahib Ələkbərov Cinayət Məcəlləsinin 182.3.1, 182.3.2 (külli miqdarda əmlak əldə etmək məqsədi ilə mütəşəkkil dəstə tərəfindən hədə qorxu ilə tələb etmə), 294.3 (sübutları saxtalaşdırma), 311.3.1 (qabaqcadan əlbir olan bir qrup şəxs və ya mütəşəkkil dəstə tərəfindən rüşvət alma) və digər maddələr ilə təqsirli bilinib. 
Bakı Hərbi Məhkəməsinin hökmü ilə Mövlam Şıxəliyev 12 il, Vüsal Ələkbərov 12 il 6 ay, Yasin Məmmədov 10 il 6 ay, Sahib Ələkbərov isə 8 il müddətinə azadlıqdan məhrum olunub. Mövlam Şıxəliyev və ailə üzvlərinin adına rəsmiləşdirilmiş əmlaklar müsadirə edilib.