“WhatsApp”dan yeni faydalı funksiya – Fayl paylaşma

“Meta” şirkəti “WhatsApp”da həyatınızı asanlaşdırmaq üçün fayl paylaşma funksiyasını təqdim edib. 
Manevr.az xəbər verir ki, bu bir növ məşhur ani messencerin istifadəçiləri üçün “AirDrop”un analoqudur.
“WhatsApp” indi yaxınlıqdakı insanlarla faylları cəld paylaşmaq imkanı təklif edir. 

Beləliklə, tətbiqdə “Yaxınlıqdakı İnsanlar” bölməsi quraşdırılıb. Faylı ötürmək üçün həm göndərən, həm də alıcı bu bölməni öz smartfonlarında açmalıdır. Köçürməyə başlamaq üçün sadəcə smartfonu silkələmək kifayətdir.
Məxfiliyə gəlincə, qeyd olunur ki, fayl paylaşımı başdan-ayağa şifrələmə ilə qorunur və kontaktı olmayanlar digər tərəfdən istifadəçinin telefon nömrəsini görmürlər.
İndi yenilik testin son mərhələsindədir və tezliklə “App Store” və “Google Play”də görünəcək.
Bundan əvvəl “WhatsApp” zənglər zamanı IP ünvanınızı gizlətmək imkanı təqdim etmişdi. Həmçinin məşhur messencerdə  dinlənildikdən sonra silinən səsli mesajlar da əlçatan olub.
Və hətta əvvəllər “WhatsApp”, istifadəçilərin tələbi ilə  köhnə, lakin populyar funksiyanı qaytarmışdı. Söhbət bir ildən çox əvvəl silinmiş “birdəfəlik” foto və videoların göndərilməsi imkanından gedir.