Şağan Olimpiya İdman Kompleksində gənc cüdoçu Turan Rüstəmovu qətlə yetirməkdə təqsirləndirilən Ruslan Səfixanovun məhkəmə istintaqı zamanı verdiyi ifadəsi məlum olub.

Bakı Ağır Cinayətlər Məhkəməsinin hakimi Rasim Sadıxovun sədrliyi ilə keçirilən prosesdə təqsirləndirilən şəxs elan edilmiş ittiham üzrə özünü qismən, yəni Cinayət Məcəlləsinin 120.1-ci (qəsdən adam öldürmə) maddəsi ilə təqsirli bilib.

O ifadəsində göstərib ki, Sumqayıt şəhər sakinidir, Azərbaycan Dövlət Bədən Tərbiyəsi və İdman Akademiyasının 3-cü kurs tələbəsidir. Cüdo idman növü ilə uşaqlıqdan məşğul olub, Azərbaycanda və xarici ölkələrdə nailiyyətləri var.

Ruslan Səfixanovun sözlərinə görə, hadisə günü saat 09 radələrində Bakı şəhəri, Xəzər rayonu, Şağan qəsəbəsində yerləşən Gənclər və İdman Nazirliyinin nəzdində olan Şağan Olimpiya İdman Kompleksində yetkinlik yaşına çatmayan idmançılar arasında idman yarışları keçirilib. Həmin yarışa Sumqayıtdan məşqçilərin rəhbərliyi ilə 9 nəfərlik heyət gəlib. O, isə psixoloji və mənəvi dəstək vermək üçün həmin komanda ilə yarışa qoşulub.

Təqsirləndirilən şəxs deyib ki, yetkinlik yaşına çatmayan zərərçəkmiş Turan Rüstəmovu həmin günədək tanımayıb, onunla birgə yarışlarda olmayıb, heç bir ədavəti və düşmənçiliyi olmayıb. Həmin gün saat 10 radələrində yarış başlanılıb, təxminən saat 12 radələrində komanda üzvləri olan Elmir və Kənanla birlikdə idman kompleksinin yanında yerləşən "Oba Market”ə gedərək oradan çörək, pendir, kolbasa, 500 ml həcmdə spirtli içki olan araq alaraq idman kompleksinə qayıdıb. Geri qayıdıb nahar etməyə başlamaq istəyəndə məlum olub ki, aldıqları ərzaqları doğramaq üçün bıçaq yoxdur. Bu səbəbə görə idman kompleksinin yaxınlıqda yerləşən adını bilmədiyi inşaat malları mağazasından bir ədəd mətbəx bıçağı alıb geri qayıdıb. Nahar zamanı aldığı 0,5 litr həcmində araqdan 100 qramını soyuq çayla qarışdırıb içib.
Ruslan bildirib ki, saat təxminən 14 radələrində komandanın yarışını tatamiyə yaxın məsafədə yerləşən tribunadan izləyib, pilləkənlərlə tribunaya doğru qalxan zaman Turanın orada tək oturduğunu görüb: "Turan ayaqlarını qarşısındakı oturacağın üzərinə qoyduğu üçün mənim oturmağıma maneə yaratdı. Ona buna görə irad tutaraq ayaqlarını oturacaqdan endirməsini tələb etdim. Cavabında Turan məni söyüb təhqir etdi. Bu səbəbdən Turana bir şillə vurdum. Turan isə mənə təpik-yumruq atdığı üçün onu vurdum. Bu zaman Turan məni ağır söyüşlə söydüyü üçün şalvarımın belinə qoyduğum bıçağı çıxardım. Lakin həmin bıçaqla Turana yetirdiyim xəsarətlərin sayını artıq xatırlamıram. Çünki özümdə olmamışam. O zaman ayıldım ki, polislər məni tutub saxlayıb və bıçağın əlimi də kəsdiyini gördüm. Bir daha bildirirəm ki, zərərçəkmiş şəxsi 2-ci dəfə ailə üzvlərimi söydüyü üçün bu cinayəti törətdim".

Qeyd ediək ki, Hadisə ötən ilin noyabrında Xəzər rayonu Şağan qəsəbəsində yerləşən idman arenasında baş verib.

Belə ki, Sumqayıt şəhər sakini, 2002-ci il təvəllüdlü RuslanSəfixanov şəxsi münasibətlər zəminində aralarında yaranan mübahisə zamanı Yevlax rayon sakini, 2006-cı il təvəllüdlü Turan Rüstəmova bıçaqla xəsarət yetirərək qəsdən öldürməsinə əsaslı şübhələr müəyyən edilib.

Ruslan Səfixanova qarşı Cinayət Məcəlləsinin 120.2.2-ci (qəsdən adam öldürmə, xuliqanlıq niyyəti ilə adam öldürmə) maddəsi ilə ittiham olunub.

Məhkəmənin hökmü ilə o, 19 il müddətinə azadlıqdan məhrum edilib.pravda.az

Manevr.az