Bu universitet qarlı havaya görə imtahana gələ bilməyən tələbələrə güzəşt edəcək

Azərbaycan Dövlət Pedaqoji Universiteti (ADPU) qış imtahan sessiyasında iştirak edə bilməyən tələbələrə yenidən imtahan vermək şəraiti yaradacaq.
Manevr.az xəbər verir ki, bu barədə ölkə.az-a ADPU-nun mətbuat katibi Cavid Hüseynov məlumat verib. O bildirib ki, ADPU-da qış imtahan sessiyasının imtahanları qrafik üzrə davam edir:
"Hazırda ölkə ərazisində və paytaxt Bakı şəhərində müşahidə olunan qarlı hava şəraiti ilə bağlı imtahanların təşkilində hər hansı problem yoxdur.
Bununla belə, Pedaqoji Universitet rəhbərliyi bildirir ki, kəskin hava şəraiti ilə bağlı yarana biləcək problemləri nəzərə alaraq, imtahanlarda iştirak edə bilməyən və ya imtahana gecikən tələbələr üzürlü hesab olunacaq və onlara əlavə vaxt təyin edilərək iştirak edə bilmədikləri və ya gecikdikləri imtahanlara yenidən qatılma imkanı yaradılacaq".