Müstəqil dövlətin vətəndaşı olaraq, hərtərəfli müdafiə təminatını hiss etmək, güclü, qanuni dövlətdə azad yaşamaq qürurvericidir. Artıq iki ildir ki, bu qürur hissini daha ürəklə və fəxarətlə yaşayırıq. Qəhrəman oğullarımızın canı-qanı bahasına 30 ilə yaxın işğalda olan torpaqlarımıza qovuşduq, Qələbə sevincini yaşadıq. Bir daha dövlətimizin, ordumuzun gücünü düşmənə və bütün dünyaya göstərdik. 44 günlük Vətən müharibəsində bütün güc strukturları, müəssisə və təşkilatlar, ayrı-ayrı qurumlar, ümumilikdə bütün xalq səfərbər oldu. Bu birlik sayəsində haqq işimizi zəfərlə başa vurduq. İstər müharibə dövründə, istər müharibədən əvvəl və sonra öz üzərinə düşən vəzifələri layiqincə yerinə yetirən, əhəmiyyətli orqanlardan biri də ədliyyə sistemidir. Ədliyyə əməkdaşının Vətən müharibəsində iştirak etməsi yuxarıda qeyd etdiklərimizin birmənalı olaraq təsdiqidir. Əməkdaşımız yüksək vəzifə daşımasına rəğmən döyüş yolunu seçdi və şəhidlik zirvəsinə ucaldı. Allah rəhmət eləsin!

Manevr.az xəbər verir ki, bu gün ədliyyə işçilərinin peşə bayramıdır. 1918-ci ildə Azərbaycan Xalq Cümhuriyyətinin yaranması ilə əsası qoyulan bir çox nazirliklərdən biri də Ədliyyə Nazirliyi idi. Ədliyyə Nazirliyinin Əsasnaməsinin 1918-ci ildə qəbulu günü – 22 noyabr ədliyyə işçilərinin peşə bayramı günü kimi təsis edilib. Bu bayram ümummilli lider Heydər Əliyevin 2000-ci il 11 noyabr tarixli Sərəncamı ilə qeyd olunmağa başlayıb. 104 illik tarixə malik olan Azərbaycan ədliyyəsinin müstəqilliyimizin indiki dönəmində də keçdiyi inkişaf, qazandığı uğur və nailiyyətlər onu göstərir ki, dövlət və dövlətçiliyimizin sütunu möhkəmdir. Artıq işğaldan azad olunmuş torpaqlarda ədliyyə orqnlarının qurulması, fəaliiyəti qürurverici olmaqla yanaşı, uğur göstəricisidir. Dövlətçilikdə əhəmiyyətli orqan olaraq, xalqa və dövlətə bağlılığımız gücümüz, fəaliyyət sferamızda mətinlik, dönməzlik nümayişimizdir.
Qeyd edək ki, 22 noyabr "Ədliyyə İşçilərinin Peşə Bayramı" ilə əlaqədar Şirvan şəhərində tədbir keçirilib. Tədbirdə Şirvan şəhər İcra Başçısı İlqar Abbasov, Şirvan Apellyasiya Məhkəməsinin sədri Vəli Abdullayev, Şirvan Regional Ədliyyə İdarəsinin rəisi Nizami Hüseynov, Şirvan Kommersiya Məhkəməsinin sədri Namidar Misirzadə, Şirvan Şəhər Məhkəməsinin sədri Elçin Qurbanov, Şirvan İnzibati Məhkəməsinin sədri Fehruz Abbasov, eləcə də, ədliyyə və məhkəmə aparatının işçiləri iştirak ediblər. Tədbirdə Azərbaycan ədliyyəsinin yaranması, keçdiyi tarix və bu günkü fəaliyyəti haqqında geniş çıxışlar səsləndirilib. Gələcək planlar və layihələr müzakirə olunub.
Azərbaycan Ədliyyəsi dövlət var olduqca var olacaq. Çünki o əmin əllərdədir. Yüksək əzm və ədalətlə çalışan ədliyyə işçilərinin göz önündə olan fəaliyyəti bunu deməyə əsas verir. Gələcəyə və gücümüzə möhkəm inam hissi ilə bütün həmkarlarımı 22 Noyabr Ədliyyə İşçilərinin Peşə Bayramı Günü münasibətiilə təbrik edirəm!

Namidar Misirzadə,
Şirvan Kommersiya Məhkəməsinin sədri