İcra nümayəndəsi 14 yaşlı qızın ərə verilməsindən DANIŞDI

Bu gün Göyçay rayonunun Çərəkə kəndində 14 yaşlı yeniyetmə qızın ərə verilməsi ilə bağlı bir neçə məqam ortaya çıxıb.
Bu barədə məlumatı kəndin icra nümayəndəsi Tehran Adıgözəlov verib.
Belə ki, 2007-ci il təvəllüdlü Fidan Rəşid qızı Əzizovanın toyu yox, nişanı imiş:
"Bizə gələn məlumat əsasında həmin evə gedib yoxlama apardıq. Bu gün toy yox, nişan imiş. Ağsu rayonundan olan 26 yaşlı oğlanla ailələr arasında üzük taxacaqdılar. Toyu isə qızın 18 yaşı tamam olanda etməyi düşünürlər. Eyni zamanda, qız bu il yox, keçən il, yəni 9-cu sinifdə məktəbdən çıxarılıb. 
Hər iki valideyn polis şöbəsinə çağırılıb, söhbət aparılıb. Hazırda nişan ləğv olunub".
İcra nümayəndəsi onun barəsində yayılan məlumatlara da aydınlıq gətirib:
"Mən kirayə qab-qacaq verənə oxşayıram? Yayılan məlumatlar yalandı. Həqiqəti əks etdirmir. Mənim də məsələdən bu gün xəbərim olub".