Etirazlara səbəb olan yolda geriyə dönmə hissəsi yaradıldı

Bakı–Quba–Rusiya ilə dövlət sərhədi avtomobil yolunun 16-cı km-də, "VAZ dairəsi" kimi adlanan ərazidə yerləşən yol qovşağında hərəkətin təşkili ilə bağlı layihənin davamı olaraq Saray-Novxanı yolunda daha yaxın məsafədə yeni geriyə dönmə hissəsi yaradılıb.
Manevr.az xəbər verir ki, bu barədə Azərbaycan Avtomobil Yolları Dövlət Agentliyi məlumat yayıb.
Məlumata görə, bu, sıxlıq və tıxacın aradan qaldırılması məqsədilə edilib.
Ərazidə zəruri yol nişanları quraşdırılıb və üfiqi nişanlanma xətləri çəkilib.
Qeyd edək ki, bir müddət əvvəl Bakı Mühəndislik Universitetinin (BMU) tələbələri “Vaz” adı ilə tanınan dairənin tamamilə bağlanması səbəbindən avtobusların universitetin qarşısına gələ bilmədiyini, buna görə hər gün əlavə yarım saat vaxt itirdiklərini bildirmişdilər.